یارییەک بۆ وازهێنانی عەلی تەهای ئەستێرەی بالە ئەنجام دەدرێت

 

یارییەکە لەنێو هۆڵی داخراوی پێشمەرگەی سلێمانی کاژێر 16:00 بەڕێوەدەچێت، یەکێتیی بالەی عێراق ئامادەکارییەکی زۆری کردووە بۆ ئەوەی رێوڕەسمێکی گەورە و یارییەکی مێژوویی لە ماڵئاوایکردنی ئەستێرە کوردەکە ساز بکات. 

 

ئەو وەرزشڤانە کوردە لە مێژووی یاریی بالەی هەرێمی کوردستان و عێراق بەنێوبانگە، بیست و پێنج ساڵ وەک یاریزان یاریکردووە و خاوەن دەیان نازناوی تاکە کەسییە، وەک کاپتنی یانەی پێشمەرگەی سلێمانی نازناوی خولی نایابی عێراقی بردووەتەوە. 

 

عەلی تەها، لە لێدوانێکی تایبەتدا بۆ رووداو سپۆرتس گوتی "برایانم لە یەکێتیی بالەی عێراق و چەند وەرزشڤانێکی دیکە پێیان باشبوو کە یارییەکی گەورە بۆ وازهێنانی من لە یاریکردن ئەنجام بدرێت، بێگومان هەڵبژاردەی عێراق دێنە شاری سلێمانی و یارییەکە بەرامبەر یانەی شەهداب یەزدە کە یانەیەکی بەسەنگە لەسەر کیشوەری ئاسیا و پاڵەوانی ئێرانە، خاوەن دەیان یاریزانی هەڵبژاردەی بالەی ئێرانە و بۆ ئەو یارییەش رێوڕەسمێکی گەورە دەکرێت". 

 

لە هەڵبژاردەی عێراق 20 ساڵ یاریکردووە، زیاتر لە 200 یاریی ناوخۆی و نێودەوڵەتی لەگەڵ یانە و هەڵبژاردەی عێراق ئەنجامداوە، بەشداری 40 پاڵەوانێتیی نێودەوڵەتی لەسەر ئاستی وڵاتانی عەرەبی و ئاسیا کردووە. 

 

تەها زیاتر روونیکردەوە "من وەک یاریزان راستە وازدەهێنم، بەڵام لە خۆشەویستانم لە یاریی بالە دانابڕیم خزمەتیان دەکەم". 

 

عەلی تەها، خەڵکی گەرمیانە و بڕوانامەی دکتۆرای لە پەروەردەی وەرزش هەیە، سەرۆکی بۆردی وەرزشیی یەکێتیی نیشتمانی کوردستانە.