چەند هەواڵێکی ناخۆش بارسێلۆنا دەهەژێنن

یانەی بارسێلۆنا بە دۆخێکی خراپدا تێدەپەڕێت و چەند یاریزانێکی یانەکە بۆ یاریی کلاسیکۆی بەرامبەر ریال مەدرید هەڕەشەیان لەسەرە و ئەگەری هەیە یاریی ناکەن.

 

یانەی بارسێلۆنا لە راگەیێنراوێکی فەرمیدا رایگەیاند، رۆبێرت لیڤاندۆڤسکی، هێرشبەری یانەکە تووشی پێکانبووە و گەڕانەوەی بۆ نێو یاریگەکان لەسەر خێرایی وەرگرتنی چارەسەرییەکانی دەوەستێت.

 

بەپێی هەواڵی میدیای ئیسپانیا، لیڤا دوای ئەوەی گەڕاوەتەوە بارسێلۆنا، پشکنینی پزیشکیی بۆ کراوە و دەرکەوتووە کە یاریزانەکە پێکانی پێشووی نوێ بووەتەوە و بەو هۆیەوە لە یاریگەکان دووردەکەوێتەوە و ئەگەری هەیە 6 هەفتەی پێویست بێت تاوەکو دەگەڕێتەوە نێو یاریگەکان.

 

بەمەش لیڤاندۆڤسکی ناتوانێت بەشداری لە یارییەکانی داهاتووی یانەکەیدا بکات، بەتایبەتیش یاریی کلاسیکۆ کە رۆژی 26ـی ئەم مانگە دەکرێت.

 

میدیای پۆڵەندا دەڵێت "هێرشبەر و کاپتنی هەڵبژاردەکە مەترسیی لەسەرە و ئەگەری هەیە مانگی داهاتوو بەرامبەر هۆڵەندا و ماڵتاش یاری نەکات."

 

جگە لە لیڤاندۆڤسکی، رافینای بەرازیلی لەسەر مەشقە تاکەکەسییەکانی بەردەوامە، یاریزانەکە ئەمڕۆ چووەتە کۆمەڵگەی وەرزشی یانەکە و بەتەنیا لە هۆڵی وەرزشیدا مەشقی کردووە، بەڵام دوای ئەوە شوێنەکەی بەجێهێشتووە و یاریزانەکە بەدڵنیاییەوە بۆ یاریی رۆژی شەممە بەرامبەر جیرۆنا ئامادەنییە.

 

رۆژنامەی سپۆرتی نزیک لە بارسێلۆنا دەڵێت "ئەو یاریزانەش بۆ یاریی بارسێلۆنا گومانی لەسەرە و ئەگەری هەیە یاریی نەکات، بەتایبەت کە لە قۆناخی وەرگرتنی چارەسەردا یاریزانەکە تووشی کەوتنێکی دیکە بووەتەوە و بەمەش پێویستی بە کاتێکی زیاتر دەبێت بۆ گەڕانەوە."

 

خوان گارسیا، گۆڵپارێزی یانەکەش ماوەی چەند هەفتەیەکە تووشی پێکانبووە، هەواڵەکان لەبارەی ئەو یاریزانەشەوە بۆ یانەکە دڵخۆشکەر نین و میدیای ئیسپانیا دەڵێت "زەحمەت گارسیا بۆ یاریی کلاسیکۆ ئامادەبێت."

 

ئێستا لە یانەی بارسێلۆنا، هەریەکە لە خوان گارسیا، گاڤی، فێرمین لۆپێز، لامین یامال، رافینیا، دانی ئۆلمۆ و رۆبێرت لیڤاندۆڤسکی پێکانیان هەیە.

 

ئەوەی بۆ هاندەرانی یانەکە جێگەی دڵخۆشییە، دوو رۆژە لەسەریەک لامین یامال بەشداری لە مەشقەکانی یانەکەدا دەکات و ئەگەری هەیە بۆ یاریی بەرامبەر جیرۆنا چەند خولەکێک یاری بکات.