عێراق نەگەیشتە مۆندیال و گراهام ئارنۆڵد هێرشدەکاتە سەر شێوازی پاشکۆکان

 

 

لە دووەم یاریی پاشکۆدا و لە کۆمەڵەی دووەمدا، لە یاریگەی جەوهەرە لە سعودیە، هەردوو هەڵبژاردەی عێراق و سعودیە رووبەڕووی یەکبوونەوە، عێراق بۆ گەیشتن بە مۆندیال پێویست بوو یارییەکە بباتەوە، لەبەرامبەردا سعودیە بەیەکسانبوون و بردنەوە دەگەیشتە مۆندیالی 2026.

 

لە نیوەی یەکەمی یارییەکەدا، سعودیە بەتەواوی کۆنتڕۆڵی یاریگەی کرد و چەند هێرشێکی بردە سەر گۆڵی میوانەکەی، بەڵام ئەو نیوەیە بەیەکسانبوون بەبێ گۆڵ کۆتاییهات.

 

لە نیوەی دووەمدا، گراهام ئارنۆڵد، راهێنەری عێراق چەند گۆڕانکارییەکی لە تیپەکەدا کرد و باشتر لە نیوەی یەکەم دەرکەوتن، هێرشیان بردە سەر گۆڵی سعودیە، بەڵام لە هەژاندنی تۆڕدا سەرکەوتوو نەبوون، یارییەکە بەیەکسانبوون بەبێ گۆڵ کۆتاییهات.

 

بەمشێوەیە و بە سوود وەرگرتن لە ژمارەی گۆڵەکانی سعودیە بە چوار خاڵ و وەکو یەکەمی کۆمەڵەی دووەم گەیشتە مۆندیالی 2026، عێراق دەچێتە پاشکۆیەکی دیکە.

 

سعودیە ئەمە سێیەمجارە لەسەریەک بەشداری لە مۆندیالدا دەکات و جاری حەوتە سەردەکەوێت، شانبەشانی تونس و مەغریب بووە سێیەم هەڵبژاردەی عەرەبی زۆرترینجار بەشداریی لە مۆندیالدا کردبێت.

 

عێراق دوای ئەم یەکسانبوونە دەچێتە پاشکۆیەکی دیکە، دوو یاری بەرامبەر ئیمارات ئەنجامدەدات، یاریی یەکەمیان لە ئیمارات دەبێت و یاریی گەڕانەوەیان لە بەسرە دەبێت، کە مانگی داهاتوو هەردوو یارییەکە دەکرێن و براوەکەی دەچێتە دوایین قۆناخی پاشکۆی پاڵاوتنەکان بۆ رکابەریکردن لەسەر گەیشتن بە مۆندیال.

 

عێراق تەنیا یەکجار بەشداریی لە مۆندیالدا کردووە، ئەویش لە 1986 بوو، لەو کاتەوە و زیاتر لە 39 ساڵە هەڵبژاردەکە نەگەیشتووەتە مۆندیال.

 

گراهام ئارنۆڵد، راهێنەری هەڵبژاردەی عێراق لە دوای یارییەکە گوتی "تاوەکو ئێستا ئێمە لە رکابەریدا ماوین و دوو یاریی دیکەمان لە مانگی 11 لەبەردەمە، قەتەر و سعودیە شەش رۆژ پشوویان هەبوو و لە یاریگەی خۆیاندا یارییان دەکرد و هەردووکیان سەرکەوتن، پێشتر بەهیچ شێوەیەک سیستمێکی لەم شێوەیەم لە کاروانی راهێنەرایەتیمدا نەبینیووە."