مۆدریچ لە تەمەنی 40 ساڵیدا مێژووی نووسییەوە

 

لە درێژەی پاڵاوتنەکانی ئەورووپا بۆ گەیشتن بە مۆندیالی 2026، هەڵبژاردەی کرواتیا لە یارییەکی یەکلاییکەرەوەدا رووبەڕووی هەڵبژاردەی دوورگەکانی فارۆ بووەوە و تەنیا پێویستی بە یەکسانبوونێک بوو بۆ ئەوەی گەیشتنی بە مۆندیالی داهاتوو مسۆگەربکات.

 

یارییەکە لە شاری ریێکای کرواتیا بەڕێوەچوو، لوکا مۆدریچ بەشێوەیەکی سەرەکی یاریکرد و توانی سەرکردایەتی هەڵبژاردەکەی بکات بۆ بردنەوەیەکی گرنگ بەئەنجامی 3-1 لە هەڵبژاردەی دوورگەکانی فارۆ و خاڵەکانی هەڵبژاردەکەی گەیاندە 19 خاڵ، بەوەش ریزبەندی یەکەمی کۆمەڵەکەی یەکلاییکردەوە.

 

هەڵبژاردەی کرواتیا پێش لوکا مۆدریچ، تەنیا 2 جار گەیشتبووە مۆندیال، بەڵام دوای دەستپێکردنی کاروانی وەرزشیی مۆدریچ، ئەو هەڵبژاردەیە توانی 5 جار بگاتە مۆندیال.

 

لوکا مۆدریچ لە ساڵی 2018 توانی لەگەڵ هەڵبژاردەی کرواتیا، بۆ یەکەمجار لە مێژووی ئەو هەڵبژاردەیە بگاتە یاریی کۆتایی مۆندیال و لە ساڵی 2022، پلەی سێیەمی مۆندیالی بەدەستهێنا، کرواتیا لەگەڵ ئەودا لە ساڵی 2023، پلەی دووەمی نەیشینسلیگیشی بەدەستهێنا.

 

مۆدریچ، لە ساڵی 2018 باڵۆندۆری بەدەستهێنا و یەکەم یاریزان بوو زنجیرە باڵۆندۆرە یەک لە دوای یەکەکانی رۆناڵدۆ و مێسی بشکێنێت، ئەو ئێستا تەمەنی 40 ساڵە و لە ئەی سی میلان یاریدەکات، پێشبینی دەکرێت ساڵی داهاتوو لە دوایین مۆندیالی خۆی بەشداربێت.