یەکەم گرێبەستی مۆرینیۆ بۆ ریال مەدرید ئاشکرابوو

 

 

هێرشبەرە گەنجە بەرازیلییەکە توانی بەشێوەیەکی نموونەیی سوود لە ماوەی خواستنەکەی وەربگرێت، بەو پێیەی تەنیا 20 یاری لەگەڵ یانە فەرەنسییەکە ئەنجامدا، بەڵام شوێنپەنجەیەکی دیاری جێهێشت بە تۆمارکردنی 8 گۆڵ و دروستکردنی 8 ئەسیست، بەمەش بەشێوەیەکی راستەوخۆ بەشداری لە 16 گۆڵدا کردووە.

 

لەوەش دیارتر ئەوەیە کە ئێندریک پلەی سێیەمی لە لیستی گۆڵکارانی لیۆن داگیرکرد سەرەڕای ئەوەی لە نیوەی ئەو یارییانەدا بەشداری کردبوو کە هاوڕێکانی ئەنجامیان دابوو، ئەمەش گوزارشت لە توانای بەرزی گۆڵ تۆمارکردن و کاریگەرییەکەی لە کاتێکی کەمدا دەکات.

 

 

لە ناو کۆڕ و کۆبوونەوەکانی یانەی شاهانەدا بڕوایەکی تەواو هەیە کە وەرزی داهاتوو دەبێت گەڕانەوەی ئێندریک بۆ  ڤاڵدێبێباس بەشێوەیەکی کۆتایی بەخۆوە ببینێت، لەگەڵ پێشبینی ئەوەی کە ببێتە توخمێکی سەرەکی لە پلانەکانی راهێنەری نوێدا، بەتایبەت لەگەڵ ئەو گەشەسەندنە بەرچاوەی لە چەند مانگی رابردوودا نیشانی داوە.

 

یاریزانە بەرازیلییەکە لە لیۆن خولەکی زیاتری بۆ یاریکردن پێدرا و لە زۆر یاریشدا بەسەرەکی بەشداری کرد و سەلماندی کە دەتوانێت شتی زۆر لەبەردەم گۆڵی رکابەرەکاندا پێشکەش بکات، ئەمەش وایلێدەکات ئامادە بێت بۆ کێبڕکێ لەسەر شوێنێکی سەرەکی لە پێکهاتەی شاهانەدا.

 

 

لەگەڵ زیادبوونی دەنگۆکان سەبارەت بەئەگەری وەرگرتنی پۆستی راهێنەرایەتی ریال مەدرید لەلایەن جۆزێ مۆرینیۆوە، سەرەڕای ئەوەی تاوەکو ئێستا هیچ پشتڕاستکردنەوەیەکی فەرمی نییە، وادیارە ئێندریک خاوەنی ئەو تایبەتمەندییانەیە کە راهێنەرە پۆرتوگالییەکە لە هێرشبەرەکانیدا بەدڵیەتی.

 

لەماوەی پێشووی لەگەڵ یانەی شاهانە، مۆرینیۆ گۆنزالۆ هیگواینی وەک هێرشبەری سەرەکی لەسەر حیسابی کەریم بنزیما پێ باشتر بوو، تەنانەت نازناوی 'پشیلە'ـی لە هێرشبەرە فەرەنسییەکە نا وەک ئاماژەیەک بۆ شێوازی یاریکردنی کە کەمتر شەڕانگێز بوو.

 

لە ئێندریکدا لەوانەیە مۆرینیۆ هێرشبەرێک بدۆزێتەوە کە تا راددەیەکی زۆر لە هیگواین بچێت، بەتایبەتی لەڕووی تووندی، جەنگاوەری، و گوشاری بەردەوام لەسەر هەموو تۆپێک، کە ئەمانە ئەو سیفاتانەن کە راهێنەرە پۆرتوگالییەکە هەمیشە لە هێڵی هێرشبەریدا بە باشیانی زانیوە.