کاپتنی زاخۆ لە ماڵپەڕی فیفا ستایشی هاندەرانی زاخۆ دەکات

 

ئەحمەد ئیبراهیم خاوەنی 118 یاری نێودەوڵەتی لەگەڵ هەڵبژاردەی عێراق، باسی لەوە کردووە ماوەی 12 ساڵ لەگەڵ هەڵبژاردەکەی بووە و لە خولەکانی ئیمارات، سعودیە و قەتەر یاریکردووە، بەڵام بۆ یەکەمجارە هاندەری لەو شێوەیە دەبینێت.

 

کاپتنی یانەی زاخۆ دەڵێت: "ماوەی 3 ساڵە یاری بۆ ئەم یانەیە دەکەم، بەراستی هاندەرانی زاخۆ جێگەی سەرسوڕمانن، لە هەموو یارییەکدا پشتیوانمانن و گرنگ نییە بەرامبەر یانەی گەورە یان بچووک یاری دەکەین، یاریگە بەردەوام پڕ دەبێتەوە و ئەوان تایبەتن".

 

هاندەرانی زاخۆ بەهۆی هەڵوێستیان لە یاری بەرامبەر یانەی حدود لە 13-5-2025 پاڵێوراوی خەڵاتەکەن، ئەحمەد ئیبراهیم رووداوەکە بە گەورە و بەشێک لە هەڵوێستە مرۆییەکانی هاندەران وەسف دەکات و ئاماژە بەوە دەکات لە دڵی هەموو هاندەرێکدا ماوەتەوە.

 

بەگوێرەی قسەکانی بەرگریکارەکەی زاخۆ، لە ناوچەکەیان منداڵی نەخۆش هەن و پێویستیان بە چارەسەر و هاوکارییە، هاندەران بەردەوام چالاکی ئەنجام دەدەن و دەچنە قوتابخانەکان، هاوکاری خەڵکی دەربەدەر و ئەوانە دەکەن پێویستیان بە خۆراک و دەرمانە.

 

ماڵپەڕی فیفا ئاماژەی بە ئاستە بەرزەکەی زاخۆ کردووە لە وەرزی 2024-2025 دوای ئەوەی پلەی سێیەمی خولی عێراقی بەدەستهێنا و گەیشتە یاریی دوایینی جامی عێراق.

 

ئەحمەد ئیبراهیم لەبارەی شارەکەوە دەڵێت: "زاخۆ شارێکی بچووکە بەڵام دڵی هاندەرانمان زۆر گەورەیە، خەڵکێکی زۆر باشن و بەردەوام رێز لە یاریزانان و تیپی بەرامبەر دەگرن".