زاخۆ بۆ بردنەوەیەکی دیکە لە عەمارەیە

 

ئەمڕۆ ئێوارە، یانەی زاخۆ بە ئامانجی تۆمارکردنی بردنەوەیەکی دیکە و بەدەستهێنانی سێ خاڵی دیکە، لە دەرەوەی یاریگەی خۆی بەرامبەر یانەی نەفت میسان یاریی دەکات و چاوی لە تۆمارکردنی دووەم بردنەوەی لەسەریەکە.

 

زاخۆ لە گەڕی رابردوودا لە بە‌غدا بە سێ گۆڵی بێبەرامبەر سەرکەوتنی بەرامبەر یانەی کارەبا بەدەستهێنا، تیپەکە بە ورەیەکی بەرزەوە رووبەڕووی نەفت میسان دەبێتەوە و دەیەوێت یەکەم بردنەوە لە مێژوودا لە دەرەوەی یاریگەی خۆی بەرامبەر ئەو یانەیە تۆماربکات.

 

یانەی زاخۆ لەم وەرزەی خولی ئەستێرەکانی عێراقدا، 5 بردنەوە، 4 یەکسانبوون و 3 دۆڕانی هەیە، ئێستا تیپەکە بە کۆکردنەوەی 10 خاڵ بەشێوەیەکی کاتی لە پلەی دەیەمی ریزبەندی خولەکەیە.

 

نەفتی میسان لەم وەرزەدا ئەنجامەکانی خراپن، 6 یاریی دۆڕاندووە، 4 جار یەکسانبووە و تەنیا 2 یاریی بردووەتەوە، ئێستا تیپەکە لە پلەی شازدەیەمی ریزبەندی خولەکەیە.

 

محەممەد کارێزی، نێردراوی رووداو بۆ رووماڵکردنی یارییەکە لە عەمارەیە و رایگەیاند، یاریزانانی یانەی زاخۆ بۆ یارییەکە ئامادەن و دوای بردنەوەیان لە یانەی کارەبا بە ورەیەکی بەرزەوە خۆیان ئامادەکردووە و دەیانەوێت بەبردنەوەوە بگەڕێنەوە.