وێنە و ڤیدیۆ؛ پاریس سانجێرمان بووە پاڵەوانی جیهان

 

 

یارییەکە لە یاریگەی بەیت لە دەوحەی پایتەختی قەتەر بەڕێوەچوو، دوای 38 خولەک یارییکردن خڤیچا کڤاراتسخێلیا گۆڵی پێشکەوتنی بۆ پاریسییەکان تۆمارکرد و نیوەی یەکەم لە بەرژەوەندی پاڵەوانی ئەورووپا تەواو بوو.

 

لە خولەکی 58 لێدانێکی سزا بۆ فلامینگۆ هەژمارکرا، جۆرجینۆ سەرکەوتووانە جێبەجێیکرد و ئەنجامەکەی یەکسانکردەوە.

 

کاتی ئاسایی و زیادکراو بە یەکسانبوون بە گۆڵێک بۆ هەرلایەک کۆتاییهات، هەردوو تیپ پەنایان بردە بەر لێدانەکانی یەکلاکەرەوە، لەلێدانەکانی یەکلاکەرەوەدا ماتڤێی سافانۆڤ، گۆڵپارێزی پاریس سانجێرمان بەشێوەیەکی زۆر نایاب دەرکەوت و چوار لێدانی گەڕاندەوە، پاریس بووە پاڵەوانی جیهان و جامی کیشوەرەکانی بردەوە.

 

ئەمە شەشەم نازناوی یانە فەرەنسییەکەیە لە ساڵی 2025 لەگەڵ لویس ئێنریکێ بەدەستیدەهێنێت، دوای بردنەوەی خولی فەرەنسا، جامی فەرەنسا، چامپیۆنزلیگ، جامی سوپەری فەرەنسا و جامی سوپەری ئەورووپا.

پاریس سانجێرمان دوو شەوی گەورە و سەرنجڕاکێشی لە قەتەر بەڕێکرد، شەوی سێشەممە عوسمان دێمبێلێ وەکو باشترین یاریزانی جیهان و لویس ئێنریکێ وەکو باشترین راهێنەری جیهان خەڵاتی زە بێستیان پێدرا و شەوی چوارشەممەش تیپەکە بووە پاڵەوان.