بارسێلۆنا زۆر خراپ لێیقەوما

 

سەرکەوتنە گەورەکەی بارسێلۆنا بەسەر نیوکاسڵ یونایتد بووە شەوێکی پڕ لە باج، دوای ئەوەی تیپەکە تووشی چەندین پێکان بوو، کە دیارترینیان پێکانەکەی خوان گارسیای گۆڵپارێز بوو، ئەمەش پێش قۆناخە یەکلاکەرەوەکانی وەرزەکە بووەتە هۆی نیگەرانیی ستافی تەکنیکی.

 

 

لە خولەکی 80، خوان گارسیا بەئاسانی بەرپەرچی هێرشێکی هارڤی بارنزی دایەوە، بەڵام تەنیا چەند ساتێک دواتر بەهۆی ئازارێکی تووند لە قاچی چەپیدا کەوتە سەر زەوی، ئەمەش وایکرد ستافی پزیشکی دەستبەجێ بچنە ناو یاریگە.

 

پشکنینە سەرەتاییەکان وایانکرد دەستبەجێ بگۆڕدرێت و ڤۆیچیک چێزنی لە شوێنی ئەو چووە ناو یاریگا، لەکاتێکدا گۆڵپارێزەکە بە پێیەکانی خۆی یاریگای جێهێشت، بەڵام دڵەڕاوکێیەکی زۆر لە ناو یانەکەدا دروستبوو.

 

 

بەپێی راپۆرتە رۆژنامەڤانییەکان، پێشبینی دەکرێت گۆڵپارێزەکە تووشی دڕانێکی سووکی ماسوولکەیی بووبێت لە بەشی پشتەوەی قاچیدا، ئەمەش واتا بۆ ماوەی دوو تاوەکو سێ هەفتە لە کاتێکی زۆر هەستیاردا دادەبڕێت.

 

ئەم پێکانە لە یاریی بەرامبەر رایۆ ڤاییکانۆ لە لالیگا دووری دەخاتەوە، هەروەها هەلی بەشداریکردنیشی لە یارییە نێودەوڵەتییەکانی داهاتوودا لەگەڵ هەڵبژاردەکەی کەم دەکاتەوە.

 

 

ستافی تەکنیکی بەسەرکردایەتی هانزی فلیک، هیوادارن پێش رووبەڕووبوونەوە یەکلاکەرەوەکان گۆڵپارێزەکە بگەڕێتەوە، بەتایبەتی لەگەڵ نزیکبوونەوەی یارییە بەهێزەکان کە چارەنووسی ئەم وەرزە لەسەر ئاستی ناوخۆیی و ئەورووپا دیاری دەکەن.

 

سەرەڕای سەرکەوتنە گەورەکە بۆ قۆناخی داهاتوو، بەڵام ئێستا بارسێلۆنا لە دۆخێکی چاوەڕوانیدایە، چونکە شەوی سەرکەوتن بووە سەرچاوەی نیگەرانییەکی راستەقینە کە هەڕەشە لە سەقامگیریی تیپەکە دەکات پێش گرنگترین قۆناخی وەرزەکە.