زاخۆ چاوی لە هاتریکە

 

 

ئەمشەو لە درێژەی یارییەکانی ئەم گەڕەی خولەکەدا، یانەی زاخۆ لە دەرەوەی یاریگەی خۆی و لە نەجەف بەرامبەر یانەی قاسم یاری دەکات، یانەکە لە دۆخێکی باشدایە و دەیەوێت درێژە بە ئەنجامە باشەکانی بدات، دوای ئەوەی لە دوو یاریی رابردوودا سەرکەوتنی بەدەستهێنا و لەو دوو یارییەدا یانەکە 7 گۆڵی تۆمارکرد و هیچ گۆڵێکی لێنەکرا.

 

زاخۆ لە نیوەی یەکەمی ئەم وەرزەی خولەکەدا، لە یاریگەی خۆیدا بە شەش گۆڵ بەرامبەر دوو گۆڵ لە قاسمی بردبووەوە و ئەمە گەورەترین بردنەوەی یانەکەیە بەرامبەر ئەو یانەیە و ئەمشەو یانەکە دەیەوێت سەرکەوتنەکەی دووبارەبکاتەوە، بەڵام ئەرکی ئاسان نییە لە کاتێکدا قاسم لە یاریگەی خۆیدا یاری دەکات، سەرەڕای ئەوەی دوو یاریی رابردووی دۆڕاندووە.

 

ئێستا زاخۆ لە پلەی سێیەمی ریزبەندی خولەکەیە و چاوی لە گەیشتن بە پاڵەوانێتییەکی دەرەوەیە و یانەی قاسم لە پلەی نۆیەمی ریزبەندی خولەکەیە.

 

یارییەکە کاژێر 20:30 لە نەجەف بەڕێوەدەچێت، راستەوخۆ لە پەیجی رووداو سپۆرتس بەکۆمێنتاریی عیسا مەجید و لە پەیجی رووداو عەرەبی بەکۆمێنتاریی لاوین هابیل دەگوازرێتەوە.