باشترینەکانی کوردستان خەڵات دەکرێن

 

هەریەک لە یانەکانی شێروانە و پێشمەرگەی هەولێر لە خولی نایاب و یانەکانی قەڵادزێ و هەڵو لە خولی پلەیەک و یانەکانی بەردەڕەش و شێخانیش لە خولی پلەدوو خەڵات دەکرێن. 

  

جەلال سەعید، ئەندامی فیدراسیۆنی تۆپی پێی کوردستان بە رووداوی راگەیاند "ئەمڕۆ پاڵەوانەکانی هەرسێ خولەکەی کوردستان خەڵات دەکەین، خەڵاتەکەی ئەمڕۆ بە میدالییا و جام و قەڵغان دەکرێت، لە رووی مادییەوە هیچ خەڵاتێک ناکرێن". 

 

ئەو ئەندامە فیدراسیۆنی تۆپی پێی کوردستان، لەبارەی ئەوەی کەی و چۆن خەڵاتە دارییەکان بە پاڵەوانەکان دەدرێن، گوتی "خەڵاتە داراییەکان لەلایەن بەڕێوبەرایەتی وەرزشەوە دابەش دەکرێن و ئەوان سەرپەرشتی دابەشکردنەکە دەکەن. ئەوان دەزانن کەی و چۆن خەڵاتە داراییەکان دابەش دەکەن".

 

ئەمڕۆ کاژێر 15:00 لە هۆڵی موفتی، خەڵاتەکان دابەش دەکرێن و نوێنەرانی هەریەک لە یانەکان ئامادە دەبن بۆ وەرگرتنی خەڵاتەکانیان. 

 

هەموو ساڵێک فیدراسیۆنی تۆپی پێی کوردستان لە رێوڕەسمێکی تایبەتدا هەردوو یانەی یەکەم و دووەمی هەرسێ خولەکانی نایاب، پلەیەک و پلە دووی کوردستان خەڵات دەکات.