محەممەد کایا بۆ رووداو: باسی گرفتەکانی ئامەدسپۆرم بۆ ئەردۆغان کرد

 

 

لەدوای ئەو رێوڕەسمی خەڵاتە، محەممەد کایا بە تۆڕی میدیایی رووداوی راگەیاند، لەگەڵ سەرۆککۆماری تورکیا باسی گرفتەکانی ئامەدسپۆریان کردووە.

 

محەممەد کایا کە سەرۆکی ژووری بازرگانی و پیشەسازیی ئامەدە، هاوکات ئەندامی ئەنجوومەنی راوێژکاریی ئامەدسپۆرە. 

 

ئامەدسپۆر ئەم ساڵ بووە پاڵەوان و لە خولی یانە پلە یەکەکانی تورکیاوە گەیشتە خولی یانە پلە نایابەکان (سوپەرلیگ).

 

ئێستا ئامادەکاریی جیدی لەلایەن کەسایەتییە دیار و ناسراوەکانی ئامەدەوە بۆ ئامادەکردنی ئامەدسپۆر دەکرێ بۆ خولی سوپەرلیک کە یەکێک لەوانە محەممەد کایایە.

 

بڕیارە رۆژی 01-06-2026 کۆنگرەی گەورەی ئامەدسپۆر بەڕێوەبچێ. لەمبارەیەوە محەممەد کایا بە رووداوی گوت، گۆڕانکاریی جیدی لە سەرۆکایەتی و ستافی یانەکەدا دەکەن و بە باشی خۆیان بۆ رکابەرییەکانی سوپەرلیگ ئامادە دەکەن.

 

ژووری بازرگانی و پیشەسازیی ئامەد لە راگەیێندراوێکدا بەبیریهێناوەتەوە کە لە ساڵی 2018ـەوە بە شێوەیەکی کارا پشتیوانیی لە ئامەدسپۆر دەکات و لەسەر ئەو هەڵوێستە بەردەوام دەبێت.

 

ئامەدسپۆر لە دوایین یاریی خولی پلە یەکی تورکیادا رۆژی 02-05-2026 بووە میوانی یانەی ئیدرسپۆر.

 

یارییەکە 3-3 کۆتایی هات و ئامەدسپۆر بەو یەکسانبوونە کۆی خاڵەکانی گەیاندە 74 لە 38 یاریدا. ئەو یانەیە بۆ یەکەمجار لە مێژوودا لە خولی پلە یەکەوە چووە خولی نایاب (سوپەرلیگ)ی تورکیا.