ئەستێرەیەک بڕیاریداوە لە رقی فلیک لە بارسێلۆنا بڕوات

 

هانزی فلیک لە وەرزی دووەمیدا وەک راهێنەری یانەی بارسێلۆنا رووبەڕووی ئاڵنگاریی گەورە دەبێتەوە، بەجۆرێک وادیارە تیپەکە دوورە لەو ئاستەی کە لە وەرزی رابردوودا هەیبوو. هەوڵەکانی راهێنەر بۆ دۆزینەوەی هاوسەنگییەکی باش لەنێوان شێوازی تاکتیکی و ئاستی یاریزانان شکستی هێناوە، کە ئەمەش بووەتە هۆی زیادبوونی هەندێک ناکۆکی لەناو ژووری جلگۆڕیندا. 

 

یەکێک لەو کێشانە پەیوەندی بە ناڕەزایی هەندێک یاریزانەوە هەیە لە رۆڵەکانیان، دیارترینیان روونی بارداخچی، باڵی سوێدییە کە هاوینی رابردوو پەیوەندی بە بارسێلۆناوە کرد.

 

 

سەرەڕای ئەو پێشبینیانەی لەسەری هەبوون، بارداخچی لەم وەرزەدا تەنیا 188 خولەک یاری کردووە، ئەمەش وایلێکردووە باوەڕی بەوە هەبێت کە تەنیا یەدەگە و ئەو دەرفەتانەی دەست ناکەوێت کە هیوای بۆ دەخواست. یاریزانە سوێدییەکە کە لەماوەی ئامادەکاریی پێش وەرزدا فلیک بەڵێنی پێدابوو خولەکی زیاتر یاری بکات، ئێستا هەست دەکات هەڵخەڵەتێنراوە و فێڵی لێکراوە، ئەمەش وایلێکردووە بیر لە رۆیشتن بکاتەوە. سەرەڕای ئەوەی هێشتا لە قۆناخێکی سەرەتایی ژیانی وەرزشیدایە و تەمەنی تەنیا 19 ساڵە، بەڵام بارداخچی لە دۆخی ئێستای لە بارسا رازی نییە و لەوانەیە داوای رۆیشتن بکات لە ماوەی گواستنەوەی زستانەدا.

 

 

بەپێی سەرچاوەکانی ناو یانەکە، دەستەوارەی گەورە هەیە بۆ ئەوەی یاریزانەکە لە مانگی یەکی داهاتوودا بەشێوەی خواستن بڕوات، سەرەڕای ئەوەی فلیک سوورە لەسەر مانەوەی لە تیپەکەدا، بەتایبەت وەک بژاردەیەکی تاکتیکی گرنگ لە یارییەکاندا، بەڵام بارداخچی پێیوایە شایستەی زیاترە لەوەی تەنیا لەسەر کورسیی یەدەگ دابنیشێت. ئەم دۆخە وایکردووە یانەکە دەرگا بەڕووی بیرۆکەی بەخشینی یاریزانەکە بەخواستن بۆ تیپێکی دیکە لە ماوەی گواستنەوەی زستانەدا بکاتەوە، کە تێیدا دەتوانێت دەرفەتی یاریکردنی زیاتری دەستبکەوێت و توانا هونەرییەکانی پەرەپێبدات.

 

 

بارداخچی دەزانێت کە لە هەمان پێگەدا کێبڕکێ لەگەڵ لامین یامال دەکات، ئەو ئەستێرە لاوەی بووەتە جێی سەرنج لە تیپەکەدا، بەڵام یاریزانە سوێدییەکە هەست دەکات دەرفەتی دەرکەوتنی بەشێوەی بەردەوام زۆر کەم بووەتەوە لەگەڵ تێپەڕبوونی هەفتەکاندا، ئەمەش وایلێکردووە باوەڕی وابێت کە دەرفەتی بەرەوپێشچوونی لە بارسێلۆنا کەم بووەتەوە. لەگەڵ نزیکبوونەوەی ماوەی گواستنەوەی زستانە، چارەنوسی بە نادیاری دەمێنێتەوە، و یانەکانی دیکەش لە نزیکەوە چاودێری دۆخەکەی دەکەن.

 

 

لە هەفتەکانی داهاتوودا، بڕیاری کۆتایی سەبارەت بە داهاتووی بارداخچی دەدرێت. لەوانەیە رۆیشتن بەخواستن گونجاوترین چارەسەر بێت بۆی لەم قۆناخەی ژیانی وەرزشیدا، چونکە کات و شوێنی بۆ دەڕەخسێت بۆ ئەوەی زیاتر یاری بکات، کە ئەمەش بەشداری دەکات لە پێگەیشتنی وەک یاریزانێک.