ڤیدیۆ؛ لە پۆرتوگال تاوانێک بەرامبەر کریستیانۆ رۆناڵدۆ ئەنجامدرا

 

پۆرتوگال و جیهانی تۆپی پێ شۆک بوون بە رووداوێک، کاتێک ئەو پەیکەرەی کریستیانو رۆناڵدۆ کە وەک هێمایەک بۆ شانازییەکانی لە دوورگەی مادێرا دانراوە، بووە ئامانجی هێرشێکی نامۆ و تێکدەرانە!

 

چیرۆکەکە لێرەوە دەست پێ دەکات؛ گەنجێکی سەرکێش و سەرشێت، لە گرتەیەکی ڤیدیۆییدا کە لە ئینستاگرام بڵاویکردووەتەوە، دەردەکەوێت ماددەیەکی سووتێنەر بەسەر پەیکەرە برۆنزییەکەی 'مووشەکەکەی مادیرا'ـدا دەڕژێنێت و ئاگری تێبەردەدات، بەڵام ئەمە هەموو شتەکە نییە! تێکدەرەکە لەبەردەم پەیکەرە سووتاوەکەدا و لەسەر ئاوازی مۆسیقای 'راپ' دەستی کردووە بە سەماکردنێکی سەیر، وەک ئەوەی کارێکی قارەمانانەی ئەنجام دابێت!

 

 

ئەو گەنجەی خۆی بە zaino.tcc.filipe دەناسێنێت، تەنیا بە سووتاندنی پەیکەرەکە نەوەستاوە، بەڵکو نامەیەکی تەمومژاوی و نامۆی نووسیوە و دەڵێت "ئەمە دوایین ئاگادارکردنەوەیە لەلایەن خوداوە". ئەمەش وایکردووە هەمووان تووشی سەرسوڕمان بن؛ ئایا ئەمە تەنیا کارێکی تێکدەرانەیە بۆ کۆکردنەوەی لایک و کۆمێنت، یان لە پشت ئەم کارەوە مەبەستێکی دیکە هەیە؟

 

 

هەرچەندە ئاگرەکە زیانی گەورەی بە پەیکەرەکە نەگەیاندووە و زوو کوژاوەتەوە، بەڵام پۆلیسی پۆرتوگال ناسنامەی تۆمەتبارەکەی دیاری کردووە و ئێستا بەدوایدا دەگەڕێن. هەوادارانی رۆناڵدۆش لە تۆڕە کۆمەڵایەتییەکاندا هێرشی تووندیان کردووەتە سەر ئەو گەنجە و دەڵێن "ئەمە بێڕێزییەکی گەورەیە بەرامبەر بە سیمبولی وڵاتەکەمان".

 

 

ئەمە یەکەمجار نییە پەیکەرەکەی رۆناڵدۆ دەبێتە مانشێتی هەواڵەکان. پێشتر لە ساڵی 2016، هەوادارانی مێسی ناوی لیۆیان لەسەر نووسیبوو. تەنانەت لەو کاتەی لە ساڵی 2014 پەردەی لەسەر لادرا، بەهۆی 'تایبەتمەندییە جەستەییە زیادەڕۆکانی' و شێوەکەیەوە، بووە جێگەی گاڵتەجاڕی و رەخنەی زۆر.

 

رۆناڵدۆ کاتی خۆی بەشانازییەوە دەیگوت "ئەمە ساتێکی زۆر تایبەتە کە پەیکەرێکم هەبێت"، بەڵام پێدەچێت نەیارەکانی نەیانەوێت تانە و لێدانەکانیان لەم ئەفسانەیە بوەستێنن، تەنانەت ئەگەر پەیکەرێکی بێدەنگیش بێت!