کۆرتوا دەیەوێت ئەستێرەیەک لە ریال مەدرید بڕوات

 

ئێدواردۆ کاماڤینگا لەنێو ریال مەدریددا لەنێو کەشێکی تەمومژاویدا دەژی، ئەمەش بەهۆی ئەو گۆڕانکارییە هونەرییە خێرایانەی کە ئەڵڤارۆ ئەربێلوا  بۆ وەرزی داهاتوو سەرپەرشتییان دەکات. دووبارە رێکخستنەوەی پێکهاتەی ناو یانەکە بووەتە هۆی هەڵسەنگاندنەوەی دووبارەی رۆڵی چەندین یاریزان، ناوی ئەم یاریزانە نێودەوڵەتییە فەرەنسییەش لە دیارترین ئەو ناوانەیە کە ئەم دواییانە پێگەیان پاشەکشەی کردووە.

 

 

کاماڤینگا تەنیا لە 14 یاری لەکۆی 26 یاریی فەرمی ئەم وەرزەدا لە سەرجەم پاڵەوانێتییەکاندا بەشێوەی سەرەکی بەشداری کردووە، ئەمەش ئاماژەیەکی روونە بۆ کەمبوونەوەی رۆڵی لە ناو سیستمەکەدا. 

 

رکابەری لە هێڵی ناوەڕاستدا تووندتر بووە، بەتایبەت لەگەڵ بۆچوونی کارگێڕیی یانەکە بۆ گرێبەستکردن لەگەڵ یاریزانێکی ئاستبەرز کە هاوسەنگییەکی تاکتیکی زیاتر بە تیپەکە ببەخشێت.

 

سەرچاوە نزیکەکان لە کەشی تیپەکەوە ئاماژە بەوە دەکەن کە پەیامەکان روون بوون: پڕۆژە نوێیەکە مافی لەپێشینەی کارەکانی دەدات بەو یاریزانانەی کە بەتەواوی لەگەڵ دیدگا هونەرییەکانی داهاتوودا دەگونجێن، ئەمەش واتا هەلەکانی کاماڤینگا سنووردار دەبن ئەگەر دۆخەکە بەم شێوەیە بەردەوام بێت. تەنانەت هەندێک لە سەرکردەکانی نێو ژووری جلگۆڕین، کە تیبۆ کۆرتوا لەسەرووی هەموویانەوەیە، جەختیان لە قورسیی رکابەریکردن لە قۆناخی داهاتوودا کردووەتەوە.

 

 

لە بەرامبەردا، بایەخێکی بەهێز لەلایەن یانەی ئیتیحادی سعودییەوە هەیە کە هەوڵ دەدات ریزەکانی بە یاریزانێکی لاوی هێڵی ناوەڕاست بەهێز بکات کە خاوەن وزە و چالاکییەکی زۆر بێت. یانە سعودییەکە بەردەوامە لە ستراتیژیی راکێشانی ناوە گەورەکان بۆ خولی پیشەگەری سعودی، کاماڤینگاش وەک بژاردەیەکی نموونەیی بۆ بەهێزکردنی هێڵی ناوەڕاست دەبینرێت، بەتایبەت کە پێویستییان بە یاریزانێکی خاوەن جەستەیەکی بەهێز هەیە کە توانای دروستکردنی جیاوازی هەبێت.

 

ئەو دەستەوارە داراییەی کە چاوەڕوان دەکرێت، لەوانەیە ببێتە هۆکارێکی گوشاری راستەقینە، چ لەسەر یاریزانەکە یان لەسەر کارگێڕیی ریال مەدرید، کە لارییان نییە لە لێکۆڵینەوە لە هەر دەستەوارەیەکی گەورە کە لەگەڵ ستراتیژییەکەیاندا بگونجێت بۆ دووبارە وەبەرهێنان لە گرێبەستە ستراتیژییە نوێیەکاندا.

 

 

کاماڤینگا وەک پڕۆژەیەکی درێژخایەن پەیوەندی بە ریال مەدریدەوە کرد و توانی رۆڵێکی گرنگ بگێڕێت و سوود لە گشتگیرییە تاکتیکییەکەی و توانای یاریکردنی لە چەندین شوێنی جیاوازدا وەربگرێت، بەڵام گۆڕانکارییە خێراکان پێشینەی پێکهاتەکەیان گۆڕیوە.

 

لە تەمەنی بیست و سێ ساڵیدا، یاریزانەکە پێویستی بە کاتی یاریکردنی بەردەوام هەیە بۆ پاراستنی ئاستی خۆی و مانەوە لە رکابەرییە ئاست بەرزەکانی ئەورووپادا. بژاردەکانی بەردەمی روونن: یان بەردەوامبوون لە رکابەری لە ناو تیپێکدا کە بەرەو قۆناخێکی نوێ و تووندتر هەنگاو دەنێت، یان تاقیکردنەوەیەکی جیاواز بەگرێبەستێکی گەورە و رۆڵێکی سەرکردایەتی لە دەرەوەی ئەورووپا.