چێڵسی لە دۆخێکی ئاڵۆزدا دەبێتە میوانی برایتۆن

 

لە رکابەرییەکانی گەڕی 34ـی پرێمەرلیگ، ئەمشەو یارییەک بەڕێوەدەچێت و یانەی چێڵسی لە دەرەوەی یاریگەی خۆی دەبێتە میوانی یانەی برایتۆن.

 

یانەی چێڵسی لە دۆخێکی باشدا نییە، دوایین چوار یاریی لەسەریەک لە پرێمەرلیگدا دۆڕاندووە و ئێستا لە پلەی شەشەمی ریزبەندی خولەکەیە، یانەکە 7 خاڵ لە پێنجەمی ریزبەندی پرێمەرلیگەوە دوورە، بۆیە جگە لە بردنەوە هیچ بژاردەیەکی دیکەی نییە.

 

یانەی برایتۆن بە پێچەوانەی چێڵسی، لە دوایین 4 یارییدا نەدۆڕاوە و دەیەوێت سوود لە یاریگە و هاندەرانی وەربگرێت بۆ ئەوەی بەشێوەیەکی کاتی لە پلەی نۆیەمی ریزبەندەوە بگاتە پلەی شەشەم و پێش یانە لەندەنییەکە بکەوێت.

 

جواو پێدرۆ، ریس جەیمس، ئێستێڤاو و لیڤی کۆلویل لە یانەی چێڵسی پێکانیان هەیە و ناتوانن لەم یارییەدا بەشداربن.

 

جەیمس میلنەر، دیێگۆ گۆمێز، ستیفانۆس زیماس و ئادەم وێبستەر لە یانەی برایتۆن پێکانیان هەیە.

 

لە دوایین دوو سەردانیدا بۆ یاریگەی برایتۆن لە پرێمەرلیگ و ئێف ئەی کەپدا، خاوەن یاریگە هەردوو یارییەکەی لە چێڵسی بردووەتەوە و 5 گۆڵی لە یانە لەندەنییەکە کردووە.

 

دوایین بردنەوەی بلۆز لە دەرەوەی یاریگەی خۆی لە 2024 بوو کاتێک بە دوو گۆڵ بەرامبەر گۆڵێک سەرکەوتنی بەدەستهێنا.