دۆسێیەکەی نیگرێرا، مێسی دوودڵ کردووە

 

بارسێلۆنا نایەوێت بەهۆی دۆسێی نیگرێراوە لەلایەن یۆفاوە سزا بدرێت و لە چامپیۆنزلیگ دووربخرێتەوە. لە کاتێکدا هەوڵەکانی چڕکردووەتەوە بۆ گرێبەستکردن لەگەڵ مێسی. بەڵام دۆسێی نیگرێرا بووەتە رێگرێکی نوێی بەردەوام گەڕانەوەکە.

 

میدیای کەتەلۆنیا ئاشکرایانکردووە، مێسی سوورە لەسەرئەوەی لە ئەوروپا درێژە بە یاریکردن بدات و بیر لە چوونە سعودیە و ئەمریکا ناکاتەوە، بەتایبەت کە دەیەوێت بەشداریی لە چامپیۆنزلیگدا بکات.

 

بەڵام بۆ بڕیاردان لە گەڕانەوە بۆ بارسێلۆنا، ئەو یاریزانە ناچارە چاوەڕێی دوا بڕیاری یۆفا بکات، لەبارەی ئەگەری سزادانی یانەی بارسێلۆنا و دوورخستنەوەی لە چامپیۆنزلیگ، بەتایبەت لە ئەگەری سزادانی بارسێلۆنادا، ئەو یانەیە داهاتەکانی بەشێوەیەکی بەرچاو کەمدەکات.

 

پێشتر یۆفا و چێفێرینی سەرۆکی، لێکۆڵینەوەیان لەدۆسێیەکەی نیگرێرا دەستپێکردووە و ئەگەری دوورخستنەوەی بارسا لە چامپیۆنزلیگی ساڵی داهاتوو، ئەگەرێکی بەردەستە.

 

میدیای کەتەلۆنیا دەڵێن، ئەگەر بارسا لە چامپیۆنزلیگ دووربخرێتەوە، هاتنەوەی مێسی بۆ یانەکە تەگەرەی گەورەی تێدەکەوێت، چونکە داهاتەکانی بارسا زۆر کەمدەکەن و بەوەش ئەو یانەیە ناتوانێ وا بە ئاسانی مێسی بهێنێتەوە ریزەکانی.