کۆرتوا لە ریال مەدرید کێشە دەنێتەوە

 

گۆڵپارێزە بەلجیکییەکە، کە هەمیشە پابەند بووە بە پاڵپشتیکردنی هاوڕێکانی، ناتوانێت هۆکاری دوورخستنەوەی یاریزانێکی لاو قبوڵ بکات کە بەردەوامە لە کارکردنی سەخت لە مەشقەکاندا و تاوەکو ئێستا هەلی پێنەدراوە بۆ بەشداریکردن بەشێوەیەکی زیاتر لە یارییە فەرمییەکاندا.

 

لە بڕیارێکدا کە پرسیاری لە ژووری جلگۆڕینی ریال مەدرید دروست کردووە، راهێنەر چابی ئەلۆنسۆ بەردەوامە لە پشتگوێخستنی هێرشبەرە لاوەکە گۆنزالۆ گارسیا، سەرەڕای درەوشانەوەی لە ماوەکانی پێشوودا، ئەمەش بووەتە جێی سەرسوڕمانی هاوڕێکانی لە تیپەکەدا و لە سەرووی هەموویانەوە گۆڵپارێزە بەلجیکییەکە تیبۆ کۆرتوا. 

 

گۆڵپارێزەکە کە بە یەکێک لە سەرکردەکانی تیپەکە و یەکێک لە باشترین گۆڵپارێزەکانی جیهان دادەنرێت، تێناگات بۆچی راهێنەر دەرفەت بە گۆنزالۆ نادات، کە توانای بەرزی نیشانداوە و یەکێک بووە لە باشترین یاریزانەکانی تیپەکە لە پاڵەوانێتییەکانی پێشوودا.

 

سەرەڕای ئەوەی هەلی زۆری لەگەڵ تیپی یەکەم پێنەدراوە، گۆنزالۆ لە جامی جیهانیی یانەکاندا کە هاوینی رابردوو لە ئەمریکا بەڕێوەچوو درەوشایەوە، کە تێیدا یەکێک بوو لە دیارترین یاریزانەکان و چەندین گۆڵی تۆمارکرد و تەنانەت بووە گۆڵکاری پاڵەوانێتییەکە،بەڵام لەگەڵ دەستپێکی ئەم وەرزەدا، خۆی لەنێو رکابەرییەکی سەختدا بینییەوە و ئەو هەلانەی دەست نەکەوت کە شایستەیەتی.

 

سەرەڕای درەوشانەوەی پێشووی، گۆنزالۆ خولەکی یاریکردنی پێویستی لە یارییەکانی دواییدا بەدەستنەهێناوە. لە دوایین سێ یارییدا، دەرکەوتنی تەنیا لە چەند خولەکێکی کەمدا کورت بووەتەوە، ئەمەش شتێکە کە زۆر لە یاریزانان، لەنێویاندا کۆرتوا، بە شتێکی بێ پاساوی دەزانن. 

 

سەرچاوەکانی نزیک لە یانەی شاهانە دەڵێن "کۆرتوا بەهۆی گۆنزالۆوە رەخنەی لە ئەلۆنسۆ گرتووە و پێیگوتووە یاریزانە لاوەکە پێویستی بە دەرفەتە بۆ بەرزکردنەوەی ئاستی و بەشداریکردن لە یارییە گرنگەکاندا". هەروەها دەڵێن "ئەلۆنسۆ بەئاشکرا لەنێو هاوڕێکانیدا گلەیی دەکات و دەڵێت نابێت گۆنزالۆ پشتگوێ بخرێت".

 

هەندێک لێکدانەوە هەن ئاماژە بەوە دەکەن کە هۆکاری پشتگوێخستنی گۆنزالۆ دەگەڕێتەوە بۆ بوونی رکابەرییەکی بەهێز لە هێڵی هێرشبەریدا، کە تێیدا یاریزانە گەورەکانی وەک کیلیان ئێمباپێ لەو باشترن،بەڵام لە هەندێک یاریدا، بەتایبەت کاتێک ئەنجامەکە یەکلابووەتەوە یان لەو یارییانەی کە تیپەکە پێویستی بە بەهێزکردنی هێرشبەر بووە، دەبووایە گۆنزالۆ هەلی بەشداریکردنی پێبدرایە. بەڵام ئەمە رووی نەدا، ئەمەش پرسیاری لەنێو تیپەکەدا سەبارەت بە بژاردەکانی راهێنەر دروست کرد.

 

گۆنزالۆ وا دەرناکەوێت بەئاشکرا گلەیی لە کەمی دەرفەتەکان بکات، بەڵام هەستی بەوە کردووە کە لەنێو تیپەکەدا بەرز نانرخێنرێت. لە تیپە لاوەکاندا، بەتایبەت لە تیپی خوار 21 ساڵ، یاریزانەکە ئاستێکی نایابی پێشکێش دەکرد، کە تێیدا بە بەردەوامی گۆڵی تۆماردەکرد و لە هەموو یارییەکاندا بەشدار بوو. بەڵام لەگەڵ تیپی یەکەمدا وادیارە دەرفەتی یاریکردنی بەشێوەی رێکخراو کەمە، سەرەڕای ئەو توانایانەی پێشکێشی دەکات.

 

ئەگەر دۆخەکە وەک خۆی بەردەوام بێت، لەوانەیە گۆنزالۆ خۆی لە دۆخێکی سەختدا ببینێتەوە. بە بوونی دەستەوارەیەکی سەرنجڕاکێش لە یانەکانی دیکەوە، بەتایبەت لە خولە گەورەکانی ئەورووپا، لەوانەیە پەیوەندیکردن بە یانەیەکی دیکەوە کە تێیدا دەرفەتی زیاتری پێبدرێت بۆ بەرەوپێشچوون و یاریکردن وەک یاریزانی سەرەکی، ببێتە بژاردەیەکی سەرنجڕاکێشتر.