یەکەم قوربانیی درەوشانەوەی کانسێلۆ لەگەڵ بارسێلۆنا

 

جواو کانسێلۆ، ئاستێکی سەرنجڕاکێشی پێشکێش کرد لە بردنەوەکەی بارسێلۆنا بەرامبەر یانەی لیڤانتێ، بە ئەنجامی 3-0 گۆڵ لە چوارچێوەی یارییەکانی گەڕی 25ـی لالیگادا.

 

کانسێلۆ لە پێکهاتەکەی هانزی فلیکی راهێنەری ئەڵمانیدا، وەک یاریزانی سەرەکی لە باڵی چەپی بەرگریدا بەشداری کرد و توانی گۆڵی دووەم دروست بکات، ئاستێکی یەکجار سەرنجڕاکێشی پێشکێش کرد و بە باشترین یاریزانی یارییەکە دیاریکرا.

 

هەروەها کانسێلۆ لە رووی بەرگرییەوە 8 جار تۆپی لە رکابەرەکانی وەرگرتەوە، 105 جار پێی لە تۆپدا و دوو بڕینی سەرکەوتووی ئەنجامدا.

 

 

وادەردەکەوێت ئەلیخاندرۆ باڵدێ، بەرگریکاری چەپی بارسێلۆنا، یەکەم کەس بێت کە بەهۆی درەوشانەوەی کانسێلۆوە زیانی پێبگات، ئەوەش بەهۆی چەند هۆکارێکەوە:

 

 

درەوشانەوەی کانسێلۆ لە باڵی چەپدا مەترسی لەسەر شوێنی باڵدێ لە پێکهاتەی سەرەکیدا دروست دەکات، بەتایبەت لەبەر ئامادەیی ئەستێرە پۆرتوگالییەکە و توانای بۆ پێشکێشکردنی هاوکاریی هێرشبەری و بەرگری بەیەکەوە.

 

 

هانزی فلیک بەوە ناسراوە کە پشت بە پێوەری ئامادەیی هونەری دەبەستێت نەک سۆز، ئەمەش لەوانەیە پێشینە بدات بەو یاریزانەی لەم قۆناخەدا کاریگەریی زیاتری هەیە، ئەمەش چانسی باڵدێ لاواز دەکات ئەگەر کانسێلۆ لە درەوشانەوە بەردەوام بێت.

 

 

بەردەوامبوونی ئاستە بەرزەکەی کانسێلۆ، لەوانەیە هاندەرانی بارسێلۆنا هانبدات داوای بەشداریپێکردنی ئەو بکەن وەک یاریزانی سەرەکی، بەتایبەت لەبەر ئارەزووی یانەکە بۆ کێبڕکێ لەسەر نازناوەکان، ئەمەش گوشارەکان لەسەر یاریزانە لاوەکە زیاتر دەکات.

 

 

باڵدێ یەکێکە لە دیارترین بەهرەمەندە تازەپێگەیشتووەکان، بەڵام هێشتا لە قۆناخی گەشەکردندایە و پێویستی بە پێگەیشتنی تاکتیکیی زیاتر هەیە بۆ دروستکردنی هاوسەنگی لە نێوان ئەرکە بەرگری و هێرشبەرییەکانیدا، لە بەرامبەردا، کانسێلۆ خاوەنی ئەزموونێکی فراوانە لەسەر ئاستی ئەورووپا و نێودەوڵەتی، ئەمەش لە یارییە گەورەکاندا باڵادەستییەکی روونی پێدەبەخشێت.

 

لە نێوان ئەزموونی کانسێلۆ و ویستنی یاریکردنی باڵدێ، وادەردەکەوێت رکابەری سەر باڵی چەپی بەرگری لە بارسێلۆنا لە قۆناخی داهاتوودا بە کراوەیی بمێنێتەوە.