کۆرتوا دوای یارییەکەی ئیلچێ بەڕووی هاوڕێیەکیدا تەقیوەتەوە

 

لە یارییەکی بەهێزدا کە ئێوارەی دوێنێ بەڕێوەچوو، ریال مەدرید تەنیا بە خاڵێک رازی بوو بەرامبەر ئیلچێ دوای بەرامبەربوون بە ئەنجامی 2-2 لە خولی ئیسپانیا، و سەرەڕای ئەوەش یانەی شاهانە گەڕایەوە پێشەنگی ریزبەندیبە کۆکردنەوەی 32 خاڵ، بەڵام جیاوازی نێوانی لەگەڵ بارسێلۆنا رکابەرە دێرینەکەی بۆ تەنیا یەک خاڵ کەمبووەوە، کە تیپە کەتەلۆنیەکە لە پلەی دووەم دێت بە 31 خاڵ.

 

 لە سایەی ئەم بارودۆخە ورووژێنەرەدا، دیمەنێکی دیکە هەبوو کە بووەتە هۆی نیگەرانی لە ریزەکانی تیپەکەدا. بەجۆرێک تیبۆ کۆرتوای گۆڵپارێزی بەلجیکی بێزاری تووندی خۆی نیشانداوە لە ئاستی راول ئاسێنسیۆی بەرگریکار و هاوڕێی لە تیپەکەدا، کە لەم ماوەیەی دواییدا بەردەوام ئاستێکی لاواز پێشکێش دەکات، ئەمەش کاریگەرییەکی گەورەی لەسەر ئاستی تیپەکە لە یارییەکەدا هەبوو.

 

لە کاتی یارییەکەدا بەرامبەر ئیلچێ، خاڵی وەرچەرخان لە یارییەکەدا گۆڵی دووەم بوو کە ریال مەدرید لێی تۆمارکرا، کە بەهۆی هەڵەیەکی راستەوخۆی راول ئاسێنسیۆوە هات. بەرگریکارە ئیسپانییەکە لە وەرگرتنی تۆپەکە لە یاریزانێکی ئیلچێ سەرکەوتوو نەبوو، ئەمەش رێگەی بە تیپی خاوەن یاریگە دا گۆڵی دووەمیان لە تۆڕی کۆرتوا تۆمار بکەن. هەڵە بەرگرییە ساکارەکەی ئاسێنسیۆ کاریگەرییەکی گەورەی هەبوو لە گۆڕینی رەوتی یارییەکە، و بووە هۆی بێزارییەکی زۆر لەنێو ژووری جلگۆڕینی ریال مەدرید.

 

بەپێی زانیارییەکانی رۆژنامەی دیفێنسا سێنتراڵی ئیسپانی، تیبۆ کۆرتوا تووڕەیی خۆی لە هاوڕێکەی نەشاردووەتەوە، و بێزاری خۆی لەو ئاستە لاوازە دەربڕیوە کە ئاسێنسیۆ پێشکێشی دەکات. بەجۆرێک گۆڵپارێزە بەلجیکیەکە پێیوایە ئاستی ئاسێنسیۆ لەگەڵ پێوەرەکانی ریال مەدرید ناگونجێت، و دەکرا لە بەرگریکردن لە گۆڵی تیپەکەدا یەکلاکەرەوەتر بووایە.

 

ئەو سەرچاوەیە دەڵێت "کۆرتوا بەڕووی ئاسێنسیۆدا تەقیوەتەوە و پێیگوتووە تۆ هۆکاری سەرەکی لەدەستچوونی ئەو دوو خاڵەمان بووی".

 

سەرەڕای ئەوەی ریال مەدرید توانی پارێزگاری لە پێشەنگایەتی بکات، بەڵام ململانێی ناوخۆیی نێوان یاریزانان، وەک تووڕەییەکەی کۆرتوا لە ئاسێنسیۆ، پرسیار دەوروژێنێت دەربارەی سەقامگیریی تیپەکە و توانای بۆ پارێزگاریکردن لە ئاستە بەرزەکەی. لەگەڵ کەمبوونەوەی جیاوازییەکە لەگەڵ بارسێلۆنا بۆ تەنیا یەک خاڵ، هەر پاشەکشەیەکی دیکە لەوانەیە رێگا بۆ رکابەرە کەتەلۆنییەکە خۆش بکات بۆ وەرگرتنەوەی پێشەنگی. پێویستە ئەلۆنسۆ بڕیاری یەکلاکەرەوە بدات بۆ چارەسەرکردنی کێشە ناوخۆییەکان و مسۆگەرکردنی یەکگرتوویی تیپەکە لە رووبەڕووبوونەوەی ئاڵنگارییەکانی داهاتوودا.