نهێنیی ئاستی بەرزی یانەکانی بەرازیل لە مۆندیالی یانەکان

 

 

سبەی هەینی، قۆناخی کۆمەڵەکانی مۆندیالی یانەکان کۆتاییدێت، بەڵام لە ئێستاوە هەر 4 یانە بەرازیلییە بەشداربووەکە کە بریتین لە فلۆمینێنسی، بۆتافۆگۆ، پاڵمێراس و فلامینگۆ، سەرکەوتنیان بۆ قۆناخی 16 مسۆگەر کردووە، ئەمەش بووەتە جێی سەرنجی جیهان و هەمووان سەرسامن بەو ئاستە بەهێزەی یانەکانی ئەو وڵاتە.

 

گەرمترین پرسیار ئەوەیە، بۆچی بەرازیلییەکان ئەوەندە بەهێز دەرکەوتوون لە مۆندیالەکەدا؟ چەند هۆکارێکی سەرەکی هەیە بۆ باشتر دەرکەوتنی بەرازیلییەکان و دەکرێت ئەوانە وایانکردبێت بەو شێوەیە بدرەوشێنەوە.

 

 

خولی بەرازیلی تاکە خولە لە جیهان، 4 یانەی بەشداربووی هەبێت لە مۆندیالی یانەکان، ئەوەش بۆ ئەوە دەگەڕێتەوە کە هەر 4 یانەکە، لە 4 ساڵی رابردوودا، براوەی پاڵەوانێتیی کۆپا لێبێرتادۆرێس بوون و بەو شێوەیە سەرکەوتوون، بەبێ رەچاوکردنی کورسیی تایبەتی وڵاتەکەیان.

یانەی پاڵمێراس براوەی کۆپا لێبێرتادۆرێسی 2021 بووە، فلامینگۆ براوەی کۆپا لێبێرتادۆرێسی 2022 بووە، فلومینێنسی براوەی کۆپا لێبێرتادۆرێسی 2023 بووە و بۆتافۆگۆ براوەی کۆپا لێبێرتادۆرێسی 2024 بووە.

واتە ئەم یانانە وەک پاڵەوانی کیشوەرەکانیان گەیشتوون بە مۆندیالی یانەکان و لە لووتکەی ئاستیاندا بوون، هەر بۆیەش دەکرێت ئەوە هۆکارێکی سەرەکیی ئەو دەرکەوتنە بەهێزەی ئەوان بێت لە مۆندیالی یانەکان.

 

 

بەرازیل، بەوە ناسراوە کە وڵاتێکی پڕە لە یاریزانی بەهرەدار و ناوازە، ئەوەش وایکردووە یانەکان بەشێوەیەکی ئاسانتر توانای گەیشتنیان هەبێت بە یاریزانی بەتوانا و بەهرەدار، بە نرخێکی کەمتر لەوەی یانە ئەورووپییەکان پێویستە بیدەن، چونکە ئەکادیمیای یانە بەرازیلییەکان دەتوانن راستەوخۆ و بەشێوەیەکی ئاسانتر بگەنە ئەو بەهرە درەوشاوانەی لە شەقامەکان و یارییە میلییەکانی خولە نافەرمییەکانی وڵاتەکە دەدرەوشێنەوە و دەردەکەون. جگە لەوەش، بەشێکی زۆری ئەو یاریزانانەی کە لە ئەورووپا درەوشاوە بوون و ئەزموونێکی باشیان هەبووە، گەڕاونەتەوە و سەرکردایەتی ئەو یانە بەرازیلییانە دەکەن، ئەم تێکەڵەیە وایکردووە یانە بەرازیلییەکان پێکهاتەیەکی قوڵ و تۆکمەیان هەبێت، لە هەمان کاتدا هێز و وزەی گەنجانە تێکەڵی ئەزموونی یاریزانە گەورەکان کراوە.

 

 

وەرزەکانی خولی بەرازیلی جیاوازن لە ئەورووپا، لە هەمان ساڵدا دەستپێدەکەن و لە هەمان ساڵدا تەواو دەبن، بۆ نموونە، خولی بەرازیلی ئەم وەرزە، لە 29/3/2025 دەستیپێکردووە و لە 21/12/2025 کۆتاییدێت، ئەمەش وایکردووە بە پێچەوانەی یانەکان ئەورووپا، کە دوای کۆتاییهاتنی وەرزێکی توند و بەهێز، هاتوون یارییەکانی مۆندیالی یانەکان دەکەن، یانەکانی بەرازیل تەنیا 12 یارییان لە خولی بەرازیلی و 6 یارییان لە کۆپا لێبێرتادۆرێس ئەنجامداوە، بەوشێوەیە، ئەوان ئامادەترن لە رووی توانای جەستەییەوە، کەمتریش هەست بەماندووێتی دەکەن.

 

 

ئەو 4 یانە بەرازیلییەی ئەم وەرزە لە مۆندیالی یانەکانن، لە دوایین 4 ساڵدا، لانیکەم جارێک لەو پاڵەوانێتییە بەشداربوون، ئەمە وایکردووە ئەزموونێکی باشتریان هەبێت لە هەڵسوکەوت لەگەڵ شێوازی یاریکردنی وڵات و کیشوەرە جیاوازەکان. لە کاتێکدا، تەنیا 3 یانەی ئەورووپی لە دوایین 4 ساڵدا لە پاڵەوانێتییەکە بەشداربوون، دوایینجار یانەیەکی وەکو ئینتەرمیلان بەشداریی لە مۆندیالی یانەکاندا کردبێت، پێش 15 ساڵ بووە، یانەکانی بۆرووسیا دۆرتموند، پاریس سانجێرمان، یوڤێنتوس، سالزبۆرگ، بێنفیکا، ئاتلێتیکۆ مەدرید و پۆرتۆ، یەکەمجارە لە پاڵەوانێتییەکی کیشورەیی دەرەوەی ئەورووپا بەشداربن، ئەوەش وایکردووە ئەزموونی ئەو یانانە کەمتر بێت لە هەڵسوکەوتکردن لەگەڵ شێواز و بیری وەرزشیی جۆراوجۆردا، بەپێچەوانەوە، لەبەرئەوەی یانە بەرازیلییەکان پێشتر بەشدارییان لە پاڵەوانێتیی هاوشێوەی مۆندیالی یانەکان کردووە و بەشێکی یاریزانەکانیان پێشتر لە ئەورووپا ئەزموونیان هەبووە، توانایەکی زیاتری خۆگونجاندنیان لەگەڵ هەلومەرجە جیاوازەکان هەیە.

 

 

لەبەرئەوەی بەرازیل نزیکترە لە ویلایەتە یەکگرتووەکان ئەمریکا، کە پاڵەوانێتییەکە لەوێ ئەنجامدەدرێت، هاندەرانی یانە بەرازیلییەکان بەشێوەیەکی ئاسانتر دەگەن بەو وڵاتە، ئەوانیش بەشێوەیەکی تایبەت، یاری بە یاری، لەگەڵ یانەکانیان بوون و یارمەتیدەر بوون لەوەی پشتگیریی یاریزانەکان بکەن بۆ ئەوەی باشترین ئاستی خۆیان پێشکێش بکەن.

کەشوهەوای یاریگەکان و بەرزیی پلەی گەرما، لە ئەمریکا، کاریگەریی لەسەر ئاستی یانەکانی ئەورووپا و رۆژهەڵاتی ئاسیا هەبووە، گلەیی و گازەندەیەکی زۆر لە شێواز و کاتی بەڕێوەچوونی یارییەکان کراوە، بەڵام ئەو کەشوهەوایە بەگوێرەی یانەکانی ئەمریکای باشوور و رۆژهەڵاتی ناوەڕاست ئاساییە و هەر ئەو هەلومەرجە ئاساییە کە پێشتر تێیدا یارییان کردووە، بۆیە بەشێوەیەکی ئاسانتر لەگەڵی راهاتوون و سەرکەوتوو بوون لەوەی سوودمەند بن لێی.

 

ئەم هۆکارانە دەکرێت وایانکردبێت یانە بەرازیلییەکان بەشێوەیەکی باشتر لە یانە ئەورووپییەکان و کیشوەرەکانی دیکە دەرکەون و ببنە سوپرایزی پاڵەوانێتییەکە.

 

یانەی پاڵمێراس وەک یەکەمی کۆمەڵەی یەکەم سەرکەوتووە بۆ قۆناخی 16 و لەو قۆناخەدا بەرامبەر بۆتافۆگۆ یارییدەکات، کە دووەمی کۆمەڵەی دووەم بووە، بەوەش یانەیەکی بەرازیلی لە قۆناخی هەشتی مۆندیالەکەیە.

 

فلامینگۆ وەک یەکەمی کۆمەڵەی چوارەم سەرکەوتووە بۆ قۆناخی 16 و رووبەڕووی بایرن میونشنی ئەڵمانی دەبێتەوە. هەرچی فلومینێنسییە وەک دووەمی کۆمەڵەی شەشەم سەرکەوتووە بۆ قۆناخی 16 و رووبەڕووی ئینتەرمیلانی ئیتاڵی دەبێتەوە.