ریال مەدرید نرخی فرۆشتنی ڤینیسیۆس دیاری دەکات

 

ڤینیسیۆس جونیۆر، ئەستێرەی بەرازیلیی یانەی ریال مەدرید، بە ساتێکی هەستیار و قەیراناویدا تێپەڕد دەبێت، کە چەند مانگێک لەمەوبەر کەس پێشبینی نەدەکرد. 

 

لەناو کۆڕ و کۆبونەوەکانی یانەی ریال مەدریددا، هەستێکی روو لە زیادبوون هەیە کە ئەم ئەستێرە بەرازیلییە، کە بڕیاربوو یەکێک بێت لە کۆڵەکەکانی پڕۆژە وەرزشییەکە، ئێستا بە یەکێک لە هەستیارترین قۆناخەکانی کاروانی وەرزشیی خۆیدا تێدەپەڕێت لەو کاتەوەی پەیوەندی بە تیپەکەوە کردووە. ئەوەی روودەدات تەنیا دابەزینێکی کاتیی ئاست نییە، بەڵکو قەیرانێکی روونە کە نیگەرانیی لای کارگێڕیی یانەکە و هاندەرانیش دروست کردووە.

 

لە یارییەکەی ئەم دواییەدا بەرامبەر سێڤییا، ڤینیسیۆس وەک یاریزانێکی دابڕاو لە هاوڕێکانی دەردەکەوت، هیچ کاریگەرییەکی لەسەر رەوتی یارییەکە نەبوو و نەیتوانی جۆشوخرۆشی جاران لەناو یاریگادا دروست بکات. کاردانەوەی هاندەرانی سانتیاگۆ بێرنابیۆ تووند بوو، فیکەیان بۆ لێدا، دیمەنێکی دەگمەن کە دەریخست چەندە نیگەرانن لە ئاستی ئێستای.

 

لەناو یانەکەدا، چیدی باسەکە تەنیا یارییەکی خراپ یان قۆناخێکی کاتی نییە. ڤینیسیۆس نیشانەی روونی گوشاری دەروونیی پێوە دیارە و زمان و جوڵەی جەستەی لەناو یاریگادا جێگەی مەترسین. بڕیارە ناجێگیرەکانی و نەبوونی توانای سەپاندنی خۆی، کێشەکانی قووڵتر کردووەتەوە، بەتایبەت کە دۆسێیەی نوێکردنەوەی گرێبەستەکەشی بەبێ هیچ پێشکەوتنێکی بەرچاو وەستاوە.

 

 

لە نووسینگەکانی کارگێڕیدا، دەستیان کردووە بە گفتوگۆکردن لەسەر سیناریۆ ئەگەرەکان، لەوانەش گوێگرتن لەو دەستەوارانەی کە لەوانەیە لە 150 ملیۆن یۆرۆ تێپەڕن، ئەگەر ئاستی ڤینیسیۆس باشتر نەبێت. سەرچاوەکانی نزیک لە یانەکە پێیانوایە هاوینی داهاتوو ساتێکی یەکلاکەرەوە دەبێت، چونکە خولی ئینگلیزی و بازاڕی سعودیە بەوردی چاودێری دۆخەکە دەکەن و دەرفەت هەیە بۆ گرێبەستێکی مێژوویی ئەگەر کێشەکان لەناو یانەکەدا چارەسەر نەبن.

 

 

ئەوەی ڤینیسیۆس و یانەکە ئێستا تێیدا دەژین، قەیرانێکی بێدەنگە بێ ئەوەی لێدوانی فەرمی هەبێت، بەڵام هەستەکە لەناو ڤاڵدیبیباس روونە: ئەگەر گۆڕانکارییەکی بنەڕەتی لە ماوەی داهاتوودا روونەدات، بەئەگەری زۆرەوە هاوینی داهاتوو بڕیارێکی چارەنووسساز لەسەر داهاتووی ئەم ئەستێرە بەرازیلییە بدرێت.

 

لە ریال مەدرید، یاسایەک هەیە کە ناگۆڕێت؛ ئەنجامەکان لە پێشەوەن و ناوەکان دوای ئەوە دێن، ڤینیسیۆسیش دەزانێت کە ئەم بنەمایە بەسەر ئەودا جێبەجێ دەکرێت وەک هەر یاریزانێکی دیکە.