پێرێز: باسی گەورەیی ریال مەدرید و ئێمباپێ دەکات

 

 

فلۆرێنتینۆ پێرێز، سەرۆکی یانەی ریال مەدرید لە دوای یاریی کۆتایی چامپیۆنزلیگ و بردنەوەی نازناوەکە لە هەڤپەیڤینێکی کورتدا کە لەلایەن ماڵپەری فەرمی ریال مەدریدەوە بڵاوکراوەتەوە گوتی " ئێمە یاریزانی زۆرباشمان هەیە و سوپاس بۆ هەموو لایەک، من رازیم و دڵخۆشم، بەهەمان شێوەی هاندەران، بەدرێژایی وەرز تێکوشاین و ماندووبوونی زۆرمان بینی تاوەکو گەیشتینە ئێرە، بەشێوەیەکی گشتی وەرزێکی باشبووم ئاهەنگمان بۆ بردنەوەی لالیگا گێڕا و بەشایستەییەوە نازناوەکەمان بردەوە، ئەمە بەرهەمی کاری یاریزانان و راهێنەران و هاندەرانە."

 

سەرۆکی ریال مەدرید ستایشی ئاستی کۆرتوای کرد و گوتی " کۆرتوا وەرزێکی ناوازەی بەڕێکرد، ئەو مەدریدێستایەکی راستەقینەیە، بەرای ئەو باشترین گۆڵپارێزی جیهانە، بۆیە هێناومانەتە یانەکە، ریال مەدرید رێگەی تێگەیشتنە لە ژیان و بەهاکانی و هەندێکجاریش نائومێدی، بەڵام پەیوەندیی بەهێزی نێوان یاریزانان و هاندەران زۆر گرنگە."

 

پێرێز لەبارەی کارلۆ ئەنچێلۆتییەوە قسەیکرد و گوتی " ئەو بەڕێوەبەرێکی زۆرباشی ئۆرکێسترایە، ئەو زۆرباش دەروونی یاریزانەکان دەناسێت، ریال مەدرید و تۆپی پێ بەهەمان شێوە. ئەوەی ریال مەدرید لە هەموو یانەکانی دیکە جیادەکاتەوە ئەوەیە جگە لەوەی یاریزانەکانی پیشەگەرن، زۆر مەدریدێستان.

 

لەبەشێکی قسەکانیدا فلۆرێنتینۆ باسی لە پرسی گواستنەوەی کیلیان ئێمباپێ و شکستهێنانیان بۆ گواستنەوە کرد و گوتی " ریال مەدرید بەردەوامدەبێت لەکارکردن بۆ گواستنەوەی باشترین یاریزانەکانی جیهان، بەڵام بابەتی ئێمباپێ بووە رابردوو، ئەمە کێشە نییە، ریال مەدرید وەرزیکی نایابی بەڕێکرد."

 

سەرۆک پێرێز دەڵێت " پاریس سانجێرمان، چێڵسی و لیڤەرپوول خاوەنی گەورەترین بودجەن، بۆیە باشترین یاریزانەکانیان هەیە و یارییەکانیان لەلایەن هەمووانەوە بەرز دەنرخێندرێن، بەڵام لە ریال مەدرید ئێمە هیچ دەستکەوتێک دابەش ناکەین، بەڵکو شێوازی تۆپی پێ، تێگەیشتن و قوربانیدان، خەبات و پەیوەندی لەگەڵ هاندەران، ئەمانە هەموو بەهایانەن کە لە سانتیاگۆ بێرنابیۆوە بۆمان ماونەتەوە.