جارێکی دیکە کۆمێنتارەکەی رووداو سپۆرتس یەکەمی عێراقە

ئاژانسی (ئەلیەوم)ـی عێراقی راپرسییەکی بۆ دەستنیشانکردنی باشترین کۆمێنتاری ساڵی 2025 ئەنجامدا و لاوین هابیل پلەی یەکەمی لە نێو هەموو عێراقدا بەدەستهێنا.

 

راپرسییەکە دوو هەفتە بەردەوام بوو، لاوین هابیل کە ساڵانێکی بەرچاوە کۆمێنتاری رووداو سپۆرتسە و بەزمانی عەرەبی یارییەکانی خولی ئەستێرەکانی عێراق دەگوازێتەوە و خاوەنی ژمارەیەکی یەکجار زۆری بینەرە، پلەی یەکەمی لە راپرسییەکەدا بەدەستهێنا و بووە باشترین کۆمێنتاری ساڵ لەسەر ئاستی عێراق.

 

بەپێی ئەنجامی راپرسییەکە کە ئاژانسی (ئەلیەوم) خۆی بڵاویکردووەتەوە و دوو هەفتە دەنگدان تێیدا بەردەوام بووە، لاوین هابیل کۆی 53٪ی دەنگی دەنگدەرانی بەدەستهێناوە کە بەرزترین رێژەی دەنگە و بەجیاوازییەکی یەکجار زۆر پێش نزیکترین رکابەرانی کەوتووە.

 

لە راپرسییەکەدا چەندین کۆمێنتاری بەناوبانگ و ناسراو لە سەرانسەری عێراقدا دەستنیشانکرابوون و لاوین کە تاکە کۆمێنتاری کوردی بەشداربووی راپرسییەکە بوو، بووە پێشەنگی هەمووان.

 

دوای دەستنیشانکردنی وەک باشترینی عێراق، لاوین هابیل گوتی: "شانازییەکی گەورەیە لەسەر ئاستی هەموو عێراق بوومە یەکەم و شتێکی زۆر گەورەیە وەکو کۆمێنتارێکی کورد و لە کەناڵێکی کوردی کە تۆڕی میدیایی رووداوە ببمە یەکەم".

 

بڕیارە لە ماوەی نزیکی داهاتوودا، ئاژانسەکە رێوڕەسمێک بۆ خەڵاتکردنی باشترینەکانی عێراق رێکبخات و لاوین هابیل وەک باشترین کۆمێنتاری ساڵ خەڵاتەکەی وەربگرێت.

 

لاوین هابیل لەسەر ئاستی عێراق بینەرێکی بێشوماری هەیە و بەکۆمێنتارییەکی رەوان و پڕ زانیاری و نزیک لە بینەر، توانیویەتی گۆڕەپانی کۆمێنتارانی عێراق کۆنترۆڵ بکات. پێشتر لاوین لەسەر ئاستی عێراق، خەڵاتی باشترین کۆمێنتاری لە راپرسییەکی دیکەی ئاژانسی 'راسد'ی عێراقیدا بەدەستهێنابوو.