پێدری و لامین لەسەر بارسێلۆنا هەڕەشە لە هەڵبژاردەی ئیسپانیا دەکەن

 

لە بارسێلۆنا هەستێکی زۆر بە رەزامەندی هەیە بەرامبەر بە ئێریک گارسیا، یەکێک لە جێگیرترین یاریزانەکانی تیپەکە لەم وەرزەدا. یاریزانێک کە تەنیا چاوەڕوانییەکانی بەجێنەهێناوە، بەڵکو لێیان تێپەڕیوە و بووەتە توخمێکی سەرەکی لە ناو سیستمەکەی هانزی فلیکدا، ئەوەش بەهۆی نەرمونیانی تاکتیکی و ئاستە جێگیرەکەی لە پێگە جیاوازەکاندا.

 

ئێریک گارسیا، کە وەرزێکی سەرنجڕاکێشی پێشکەش کردووە، چ لە دڵی بەرگری، یان لە باڵەکان و تەنانەت وەک یاریزانی دڵی بەرگریش. ئەم هەمەجۆرییە، لەگەڵ هێمنی لە دروستکردنی یارییدا و پابەندبوونی تاکتیکی وایکردووە ببێتە جێی متمانەی تەواوی ژووری جلگۆڕین و دەستەی هونەری.

 

 

لەناو تیپەکەدا، ئەم درەوشانەوەیە بێدەنگ تێپەڕ نابێت. هەریەکە لە لامین یامال و پێدری پێیانوایە یاریزانانی بارسێلۆنا شایەنی ئەوەن لە هەڵبژاردەی ئیسپانیا بایەخی زیاتریان پێبدرێت، بەتایبەتی ئێریک گارسیا، کە تاوەکو ئێستا لەلایەن لویس دی لافوێنتییەوە پشتگوێ خراوە، ئەوان لەو بڕوایەدان کە هاوڕێکەیان شایستەی هەنگاوێکی گەورەترە، و بە یەکێک لە باشترین بەرگریکارەکانی ئێستای ئیسپانیا دای دەنێن. ئەوان پێیانوایە ئامادەبوونی گارسیا لە لیستی هەڵبژاردەی ئیسپانیا بۆ مۆندیالی2026، شتێکی لۆژیکی و شایستەیە بەلەبەرچاوگرتنی ئەو ئاستەی لەسەر یاریگا پێشکەشی دەکات.

 

دیدگای ئەم دوو ئەستێرەیە تەنیا پشتی بە ئاستی بەرگری ئێریک نەبەستووە، بەڵکو پەیوەندی بە توانای خۆگونجاندنییەوە هەیە لەگەڵ زیاتر لە رۆڵێکدا لەناو یارییەکەدا، کە ئەمەش تایبەتمەندییەکی دەگمەنە و لە سەختترین ساتەکاندا چەندین چارەسەر دەداتە هەر راهێنەرێک.

 

 

سەرەڕای ئەمانە، رێگای گەیشتن بە هەڵبژاردەی نیشتمانی ئاڵۆزتر دەردەکەوێت. لویس دی لافوێنتی، هەرچەندە بەردەوام باس لە بنەمای هەلی یەکسان دەکات، بەڵام لە کرداردا پشت بە دۆخێکی جێگیری یاریزانەکان دەبەستێت و دوودڵە لە ئەنجامدانی گۆڕانکاری بنەڕەتی لە هێڵی دواوەدا، ئەمەش هەلی دەرکەوتنی ناوە نوێیەکان  لەم کاتەدا کەم دەکاتەوە.

 

ئەم واقیعە وایکردووە پێدری و لامین وا هەست بکەن کە ئێریک گارسیا ئەو نرخەی پێ نادرێت کە رەنگدانەوەی ئاستە راستەقینەکەی بێت، بەتایبەتی لەچاو ئاستی هەندێک لەو ناوانەی ئێستا لە لیستی لارۆخادان. تەنانەت هەندێک لە سەرچاوەکان باس لەوە دەکەن کە ئەو دوو ئەستێرەی بارسا و هەڵبژاردەی ئیسپانیا ناڕاستەوخۆ هەڕەشەیان کردووە و دەڵێن پێویستە ئێریک بانگهێشتی لارۆخا بکرێت.

 

ئەگەر ئێریک گارسیا بەم شێوەیە بەردەوام بێت لە سەپاندنی خۆی، لەوانەیە دەستەی هونەری هەڵبژاردەی ئیسپانیا ناچار بێت زوو یان درەنگ پێداچوونەوە بە بڕیارەکانیدا بکات.