ریال مەدرید چاوی لە سێیەم بردنەوەی لەسەریەکە

 

لە رکابەرییەکانی گەڕی سێیەمی خولەکەدا، کاژێر 22:30 یانەی ریال مەدرید لەنێو یاریگە  و هاندەرانیدا میوانداریی یانەی ریال مایۆرکا دەکات و دەیەوێت سێیەم بردنەوەی لەسەریەک تۆمار بکات.

 

لۆس بلانکۆس دوو یاریی رابردووی بردووەتەوە، لە دوایین مەشقەکانی یانەکەدا تیپەکەی چابی ئەلۆنسۆ بە ئارامییەکی زۆرەوە خۆی بۆ ئەم یارییە ئامادەکردووە و چاوی لە بردنەوەیەکی دیکەیە، بەتایبەت کە یارییەکە لەنێو یاریگەی خۆیان و هاندەرانیاندایە.

 

مایۆرکا لە دوو یاریی رابردوودا تەنیا یەک خاڵی بەدەستهێناوە و پێناچێت بتوانێت بەربەست بخاتە بەردەم هەنگاوەکانی ریال مەدرید بۆ کۆکردنەوەی خاڵ لە رکابەرییەکەدا.

 

لە دوایین پێنج یاریی نێوان هەردوو یانەدا تەنیا یەک یاری بە یەکسانبوون کۆتاییهاتووە و ریال مەدرید چوار یارییەکەی دیکەی بردووەتەوە.

 

جود بێلینگهام، ئێدوارد کاماڤینگا، ئێندریک و فێرلان مێندی بەهۆی پێکانەوە بەشداری لە یارییەکەدا ناکەن و چاوەڕواندەکرێت فرانکۆ ماستانتونۆ ئەمشەو لە پێکهاتەی سەرەکیدا یاری بکات.