ئەستێرەیەکی بارسا لەبەر لامین داوای رۆیشتنی کردووە

 

لەنێو یانەی بارسێلۆنادا هەمووان کۆکن لەسەر ئەوەی روونی بارداخچی یەکێکە لە بەهرەمەندترین یاریزانە لاوەکانی ئێستای تیپەکە، بەڵام درەوشانەوەی بێوێنەی لامین یامال وایکردووە ئەم یاریزانە سوێدییە بیر لە جێهێشتنی قەڵای بلاوگرانا بکاتەوە.

 

بارداخچی، کە لە باڵی راستی هێرشبەریدا یاری دەکات، خاوەن کەسایەتییەکی بەهێز و توانایەکی سەرنجڕاکێشی بڕین و تێپەڕاندنە، بەڵام راستییەکانی ناو یاریگە ترسی لەلا دروست کردووە. ئەو یاریزانە دەبینێت کە هەلەکانی بۆ یاریکردن زۆر سنووردارن، چونکە لامین یامال بووەتە بەردی بناخەی پلانەکانی هانزی فلیک و زۆربەی خولەکەکانی یاریکردن و سەرنجی میدیاکانی بۆ خۆی بردووە.

 

روونی بارداخچی، تەمەن 20 ساڵ، دەزانێت کە بۆ گەشەکردنی پێویستی بە یاریکردنی بەردەوام هەیە. ئەو پێیوایە مانەوەی لەسەر کورسیی یەدەگ لەم قۆناخە هەستیارەی تەمەنیدا، زیان بە کاروانی وەرزشیی دەگەیێنێت، تەنانەت ئەگەر ستافی تەکنیکی متمانەیەکی زۆریشی پێیان هەبێت.

 

بەهۆی ئەم بارودۆخەوە، بارداخچی خواستی خۆی بۆ جێهێشتنی بارسێلۆنا لە وەرزی گواستنەوەی هاوینەی داهاتوودا دەربڕیوە. بژاردەی یەکەمی ئەو یاریزانە چوونە بۆ یانەیەک بەشێوازی خواستن بۆ ئەوەی خولەکی زیاتری یاری پێبدرێت، بەڵام ئەگەری فرۆشتنی هەمیشەییش دوور نییە ئەگەر گرێبەستێکی گونجاو پێشکەشی یانەکە بکرێت.

 

کارگێڕیی بارسێلۆنا تێدەگەن کە مانەوەی بارداخچی لە پەراوێزی تیپەکەدا لەژێر سێبەری لامین یامال، لەوانەیە ئەنجامی پێچەوانەی هەبێت. بۆیە پێشبینی دەکرێت هاوینی داهاتوو یەکێک لە دیارترین بەهرەمەندە لاوەکان ماڵئاوایی لە بارسا بکات؛ نەک لەبەر کەمیی کوالێتی، بەڵکو لەبەرئەوەی کێبڕکێکردن لەگەڵ لامین یامال لەو پێگەیەدا بووەتە کارێکی مەحاڵ.