یانەی هەولێر گەیشتە یاریی کۆتایی جامی عێراق

 

 

لە یەکەم یاریی قۆناخی پێشکۆتایی پاڵەوانێتییەکەدا، هەولێر لە بەغدا رووبەڕووی یانەی حدوود بووەوە و یارییەکەی بە گۆڵێکی بێبەرامبەر بردەوە و بۆ یەکەمجار لە مێژوویدا خۆی گەیاندە یاریی کۆتایی پاڵەوانێتییەکە.

 

هەولێر لە نیوەی یەکەمی یارییەکەدا بە ئاستێکی بەرزەوە دەرکەوت، بەڵام نەیتوانی گۆڵ بکات و نیوەی یەکەم بەیەکسانبوون بەبێ گۆڵ کۆتاییهات.

 

لە نیوەی دووەمی یارییەکەدا هەولێر درێژەی دایە هێرشەکانی و لە خولەکی 52 مەحموود خەلیل، گۆڵی پێشکەوتنی بۆ یانە زەردپۆشەکە تۆمارکرد و هەولێری پێشخست.

 

دوای ئەم گۆڵە حدوود هەوڵی زۆریدا بۆ ئەوەی ئەنجامەکە راستبکاتەوە، هەولێریش بەرگرییەکی باشی لە گۆڵەکەی کرد و یارییەکە بە گۆڵێکی بێبەرامبەر لە بەرژەوەندیی یانەی هەولێر کۆتاییهات و یانەکە بۆ یەکەمجار لە مێژوویدا گەیشتە یاریی کۆتایی جامی عێراق.

 

هەولێر لە یاریی کۆتایی جامی عێراقدا، بەرامبەر براوەی یاریی نێوان هەردوو یانەی قوە جەوییە و کەرخ یارییدەکات، کە رۆژی سێشەممە لە دووەم یاریی ئەم قۆناخەدا رووبەڕووی یەکدەبنەوە.

 

دوای بردنەوەی هەولێر و گەیشتنی بە یاریی کۆتایی جامی عێراق، ئومێد خۆشناو، پارێزگاری هەولێر بە تۆڕی میدیایی رووداوی گوت "هەموو پاڵپشتییەکی یانەی هەولێر دەکەین و بەڵێنەکەمان بە زیادەوە بۆ یاریزانەکان دەبەینە سەر و هیوادارم ئەم ساڵ نازناوەکە بۆ هەولێر بێت."    

یانەی هەولێر پێشتر چوار لە ساڵی 2007، 2008، 2009 و 2012 چوار جار نازناوی خولی یانەکانی عێراقی بردووەتەوە و یەکەمجارە لەسەر ئاستی جامی عێراق دەگاتە یاریی کۆتایی پاڵەوانێتییەکە.