سوهەیلە قازی: وەسیەتی عەلی کاکم ئەوە بووە لە مهاباد بە خاک بسپێردرێت

 

 

زنار شینۆ، پەیامنێری رووداو لە ئەڵمانیا دەڵێت، دوای ئەوەی بەرەبەیانی ئەمڕۆ یەکشەممە عەلی قازی، کوڕە تاقانەکەی پێشەوا قازی محەممەد لە شاری بۆنی ئەڵمانیا کۆچی دواییکرد، ئێستا پرسەکەی لەنێو مزگەوتی ئاییندە لە شاری کۆڵن دانراوە، هاوژین و کوڕ و کچ و خوشکێکی و کەسوکارەکەی و خەڵکی رۆژهەڵات و پارچەکانی دیکەی کوردستان ئامادەی پرسەکەین.

 

سوهەیلە قازی، خوشکی عەلی قازی و یەکێک لە کچەکانی پێشەوا قازی محەممەد بە رووداوی راگەیاند، "بەر لە دوو رۆژ دوای ئەوەی دۆخی تەندروستیی تێکچوو، برایە نەخۆشخانە، بڕیار بوو ئەمڕۆ بیهێننەوە ماڵەوە؛ بەڵام کاژێر 03:40 بەرەبەیانی ئەمڕۆ لە نەخۆشخانە دڵی وەستا و کۆچی دواییکرد، لە 9ی مانگی رابردووەوە نەخۆش کەوتبوو، لەسەر جێگە بوو نەیدەتوانی نە قسە بکات و نە گوێی لە [قسە] بێت."

 

لەبارەی دوایین وەسیەتی براکەی، سوهەیلە گوتی، "ئەوکاتەی لە نەخۆشخانە بوو دەیتوانی قسە بکات، بەڵام ئەو هەستەی نەبوو کە رۆژێک بێت و لەسەر جێگە بکەوێت و نەتوانێت قسە بکات یان نەتوانێت ببینێت و ببیستێت، هەمیشە کاکم دەیگوت ئەگەر من شتێکم لێ بەسەرهات ئارەزووم ئەوەیە و دەبێت ئەوەشم بۆ بکەن، بمبەنەوە بۆ مهاباد و لەوێ لای باوکم بەخاکم بسپێرن، ئەوە وەسیەتی بوو کە بە قسە بە ئێمەی دەگوت. ئارەزووی ئێمەش هەر ئەوەیە لە مهاباد بەخاک بسپێردرێت، چونکە باب و باپیرانم هەر لەوێ بەخاک سپێردراون."

 

بە گوتەی سوهەیلە، ئەوان حەوت خوشکن، ئەو تاقە برایەیان هەبوو، کە برا گەورەشیان بوو، "ئێستا سێ خوشک ماوین، من و دوو خوشکی دیکەم کە ئەوان لە مهاباد دەژین، منیش ماوەی 43 ساڵە لە ئەڵمانیا دەژیم."

 

لەبارەی رێوشوێنەکان بۆ گواستنەوەی تەرمی عەلی قازی بۆ ئێران، سوهەیلە قازی ئاماژەی بەوە کرد، "بەیانی بەنیازین سەردانی کۆنسوڵخانەی ئێران لە فرانکفۆرت بکەین، بۆئەوەی بزانین هەڵوێستیان چی دەبێت."