هۆڵەندا داوای پێدانی زانیاری لەبارەی داعشێکەوە دەکات

 

بەپێی بانگەوازەکەی پۆلیس ساڵی 2019 پیاوێکی 37 ساڵەی خەڵکی سووریا لە هۆڵەندا داوای مافی پەنابەریی کردووە.

 

سەرەتای ساڵی 2023 ئاشکرا بووە کە ئەو کەسە پێشتر داعش بووە و بەشداریی لە کوشتنی ژمارەیەکی زۆر خەڵکدا کردووە. بۆیە دەستگیریان کردووە. بەڵام هێشتا بەڵگە و شایەتیی زۆرتر پێویستن بۆئەوەی کەیسەکەی لە دادگە یەکلایی ببێتەوە.

 

بۆیە داوایان لە خەڵکی هۆڵەندا، سووریا و عێراق و وڵاتانی دیکەش کردووە کە هەرچییەکیان هەیە لەسەر ئەو داعشە دەستگیرکراوە بینێرن و بێن شایەتی بدەن.

 

وەک پۆلیسی هۆڵەندی ئاشکرایکردووە، ئەو کەسە لەنێو داعش و پێشتریش جەبهەتول نوسرەدا ناوی خالید ئەلئەمنی بووە. 

 

لەنێوان ساڵانی 2023 تاوەکو 2018 یەکێک بووە لە فەرماندەکانی داعش و پێشتریش نوسرە. لەژێر فەرماندەیی ئەودا لە ناوچەی یەڵدای نزیک دیمەشق، 12 زیندانی و دیل گوللەباران کراون.