لە ئەڵمانیا کوردێک رکابەری بۆ پۆستی سەرۆکی شارەوانیی کۆلن دەکات

 

لە حەفتاکانی سەدەی رابردوودا، باوکی بێریڤان سەرۆکی شارەوانیی چەولیک بووە و بێریڤانیش دەیەوێت وەکو باوکی ببێتە سەرۆک شارەوانی، بەڵام لە کۆلن.

 

بایرام ئایاز، دۆستی نزیکی بێریڤان ئایماز لەو رووماڵە تایبەتەدا بووە میوانی هێمن عەبدوڵڵا، پێشکێشکاری تۆڕی میدیایی رووداو و گوتی: "بێریڤان دەتوانێت ببێتە نوێنەری کورد و نوێنەرایەتییەکی زۆر باش بکات و خزمەتێکی گەورە بە کوردەکانی ئەم شارە بکات. خێزانی بێریڤان زۆر کورد پەروەرن و من شایەتیی ئەوەم، بێریڤان لە هەموو کۆبوونەوەکاندا لەم شارە دەڵێت، من لە چەولیک لەدایکبووم و لە خێزانێکی کوردم."

 

بەگوێرەی راپرسییەک کە ناوەندی لێکۆڵینەوە و راپرسیی فۆرسا کردوویەتی، پارتی سەوزەکان یەکەم دەبن و رێژەی 23٪ی دەنگەکان بەدەست دەهێنن، رەنگە لە خولی یەکەمدا بێریڤان نەبێتە سەرۆکی شارەوانی، بەڵام لە خولی دووەمدا ئەگەری بەهێز هەیە ئەو خانمە کوردە ببێتە سەرۆکی گەورە شارەوانی کۆلن.