ئیڤان دۆکێ بە سەرۆکی کۆڵۆمبیا هەڵبژێردرا

رووداو - هەولێر

ئەنجامی خولی دووەمی هەڵبژاردنی سەرۆکایەتیی کۆڵۆمبیا راگەیێنرا و ئیڤان دوکێ، سەرۆکە نەریتخوازەکەی پارتی سەنتەری دیموکراتی وەکو سەرۆکی وڵات هەڵبژێردرا.

پارتەکەی ئیڤان دوکێ، بە بەدەستهێنانی 54%ی دەنگەکان بەسەر پیترۆ گوستاڤۆ، سەرۆکی بزووتنەوەی پێشکەوتنخواز سەرکەوت کە ئەویش 41.8%ی دەنگەکانی بەدەستهێنان.

ئیڤان دوکێ بڕیاری دابوو ئەگەر وەکو سەرۆکی وڵات هەڵبژێردرێت، تەواوی لایەنە پەرتەوازەبووەکانی رێککەوتنە مێژووییەکەی نێوان بزووتنەوەی فارک و حکومەتی کۆڵۆمبیا یەکبخاتەوە.

دوای چەندین ساڵ لە دانوستاندنی ئاشکرا و نهێنی نێوان بزووتنەوەی فارک و حکومەتی کۆڵۆمبیا، لە مانگەکانی کۆتایی 2016 توانیان کۆتایی بە شەڕی 52 ساڵەی نێوانیان بهێنن, رێککەوتن لەسەر ئەوەی کە فارک دەستبەرداری چەک بێت و وەکو پارتێکی سیاسی درێژە بە خەباتی خۆی بدات.