لە تبلیسی کۆنفرانسی کارسازانی جۆرجیا-کوردستان بەڕێوەدەچێت
رووداو دیجیتاڵ
ئەمڕۆ، لە تبلیسیی پایتەختی جۆرجیا، کۆنفرانسی کارسازانی جۆرجیا-کوردستان بە بەشداریی زیاتر لە 50 کارساز و بازرگان لە جۆرجیا، ئەرمینیا، کازاخستان، تورکیا، باشوور و رۆژئاوای کوردستان بەڕێوەدەچێت. ئامانجی کۆنفرانسەکە پتەوکردنی پەیوەندییە ئابووری و وەبەرهێنانەکانە لەنێوان هەرێمی کوردستان و جۆرجیا دا.
سەرۆکی کۆمەڵەی نێودەوڵەتیی کارسازانی کورد و جۆرجی، ئۆتاری نادرییان، لە کاتی بەشداریکردنی لە بووڵتەنی نووڕۆژی رووداو کە لەلایەن نالین حەسەنەوە پێشکێش دەکرێت، رایگەیاند، ژمارەیەکی زۆر لە کارسازانی جۆرجی دەیانەوێت لە هەرێمی کوردستان وەبەرهێنان بکەن و کار بکەن.
نادرییان، ئاماژەی بەوەدا کە بازرگانانی جۆرجیا بەتایبەتی گرنگی بە بازاڕی کوردستان دەدەن و گوتی، "کارساز و بازرگانانی جۆرجیا دەیانەوێت کەلوپەلی جۆرجی بهێننە نێو بازاڕی کوردستانەوە."
بەپێی ئەو زانیارییانەی کە نادرییان خستوویەتیەڕوو، لە هەرێمی کوردستان لەنێوان 8 هەزار بۆ 11 هەزار هاووڵاتیی جۆرجی لە کەرتە جیاوازەکاندا کار دەکەن، بەتایبەتی لە بوارەکانی هۆتێل، چێشتخانە و بیناسازیدا.
لەلایەکی دیکەوە، سەرۆکی کۆمەڵەی نێودەوڵەتیی کارسازانی کورد و جۆرجی جەختی لەوە کردەوە کە ئامادەن هەموو ئاسانکارییەک پێشکەشی ئەو کارساز و بازرگانە کوردانە بکەن کە دەیانەوێت لە جۆرجیا کار بکەن و وەبەرهێنان ئەنجام بدەن.
ئۆتاری نادرییان، هەروەها باسی لە پەیوەندییە کۆمەڵایەتی و گەشتیارییەکانیش کرد و گوتی، "زۆرێک لە کوردی ئێزدی لە جۆرجیا هەن کە دەیانەوێت سەردانی پەرستگەی لالش بکەن." ئەو ڕوونیکردەوە کە وەک کۆمەڵە هەوڵ دەدەن بۆ وەرگرتنی ڤیزا ئاسانکاری بکەن و گەشتی ئاسمانیی راستەوخۆ لەنێوان تفلیسی پایتەختی جۆرجیا و هەولێردا رێکبخەن.
لە جۆرجیا نزیکەی 10 هەزار کورد دەژین، هەرچەندە لە سەردەمی سۆڤیەتدا ژمارەیان نزیکەی 40 هەزار کەس بوو. لە رووی ئایینییەوە زۆرینەیان کوردانی ئێزدیین، بەڵام کۆمەڵێکی بچووکی مەسیحیشیان تێدایە.