چین؛ فڕۆکەیەکی مەدەنی بە 132 سەرنشینەوە کەوتەخوارەوە

 

 

فڕۆکەکە لە جۆری بۆینگ 737 بووە و سەر بە هێڵی ئاسمانیی رۆژهەڵاتی چین بووە، لە شاری کونمینگ-ەوە بۆ شاری گوانگژۆ فڕیوە و لە بەرزاییەکانی پارێزگای گوانگشی کەوتووەتەخوارەوە و سووتاوە.

 

ترسی ئەوە هەیە کە هیچکام لە سەرنشینەکانی فڕۆکەکە بە زیندوویی نەمابنەوە، بەڵام تاوەکو ئێستا هیچ لێدوان و راگەیێندراوێکی فەرمی لەبارەی قوربانیانی ئەو رووداوە نەخراوەتەڕوو.

 

بەو پێیەی کە 12 ساڵە رووداوی کەوتنەخوارەوەی فڕۆکە لە هێڵە ئاسمانییەکانی چین رووینەداوە، بەگشتی هێڵە ئاسمانییەکانی ئەو وڵاتە بە سەلامەت هەژمار دەکرێن.

 

میدیای فەرمیی چین رایگەیاندووە، تیمێکی فریاکەوتن کە لە زیاتر لە 600 کەس پێکدێن گەیشتوونەتە شوێنی رووداوەکە. ئاگرکوژێنەوەش گەیشتووەتە شوێنی رووداوەکە و ئەو ئاگرەیان کۆنترۆڵکردووە کە لە دارستانی سەر چیاکە بەهۆی سووتانی فڕۆکەکەوە کەوتووەتەوە.

 

بەکارهێنەرانی تۆڕە کۆمەڵایەتییەکان لە چین وێنە و ڤیدیۆی شوێنی رووداوەکەیان بڵاوکردووەتەوە کە لەلایەن گوندنشینانی نزیک لە شوێنی رووداوەکە تۆمارکراون، تێیاندا ئاگر و دووکەڵێکی زۆر دەردەکەوێت کە لە چواردەوری فڕۆکەکە دەبینرێت.