گرووپی 'ژیانی کورد' لە پەرلەمانی ئەڵمانیا دامەزرا

 

لە ئەڵمانیاوە قاسم تاهیر ساڵح، ئەندامی پەرلەمانی وڵاتەکە، خاوەنی دەستپێشخەرییەکە بەناوی پارتی سەوزەوە و میوانی دیاسپۆرا بوو؛ لەوبارەیەوە رایگەیاند، ئەڵمانیا وڵاتێکی مەزنە و ژمارەیەکی زۆری کوردی تێدایە کە زیاتر لە ملیۆنێک و 500 هەزار کورد دەبن، بۆیە دروستکردنی ئەو گرووپەیان بە پێویست زانی.

 

قاسم تاهیر کە خەڵکی شاری زاخۆی باشووری کوردستانە و ئێستا ئەندامی پەرلەمانی فیدراڵی ئەڵمانیایە لەسەر لیستی پارتی سەوزەکان دەڵێت، "ئامار و ژمارە لەبارەی کورد لە ئەڵمانیا زۆر کەمن، بەڵام ئەوە ئاشکرایە کە زیاتر لە ملیۆن و نیوێک کورد لەو وڵاتەدا دەژین، ئێمە لە رێگەی گرووپەکەمان دەمانەوێ خزمەتیان بکەین و هەوڵدەدەین ژیانێکی باشتریان بۆ دابین بکەین".

 

قاسم تاهیر گوتیشی، "هاوکاری و پاڵپشتییەکانمان تەنیا بۆ کوردی نیشتەجێی ئەڵمانیا نییە، بەڵکو دەمانەوێ لە رێگەی گرووپەکەمان لە پەرلەمانی فیدراڵی ئەڵمانیا هاوکاریی کوردستان بکەین و هەوڵدەدەین کۆمپانیاکانی ئەڵمانیا ببەینە کوردستان و لەوێ هەریەکە و لە پسپۆڕی و شارەزایی خۆی خزمەت بکات و وەبەرهێنان لەوێ بکات".

 

پەرلەمانتارەکەی پەرلەمانی ئەڵمانیا روونیکردەوە کە لە نێو گرووپەکەیاندا نوێنەری هەموو پارتەکانی ئەڵمانیا هەن، واتە هەر پارتە و ئەندامێکی لەنێو گرووپەکەیان هەیە و ئەمەش پاڵپشتیی زیاتری کارەکانیان دەکات.

 

قاسم تاهیر دەشڵێت: "کورد پاڵپشتییەکی گەورەی لەنێو پەرلەمانی ئەڵمانیادا هەیە و ئێمەش لە رێگەی گرووپەکەمانەوە دەمانەوێ ئەو پاڵپشتییە زیاتر بکەین و پلانمان هەیە گرووپەکەمان فراوانتر و گەورەتر بکەین و لەو رێگەیەوە لۆبی بۆ دۆزی کورد بکەین و پاڵپشتیی حکومەتی ئەڵمانیا بۆ هەرێمی کوردستان و هەروەها بۆ هەموو پارچەکانی دیکەی کوردستان بکەن".