Hewlêr (Rûdaw) - Wezîrê Xezîneyê yê Amerîkayê Scott Bessent ragihand ku wan bi demkî destûr daye ku ew petrola Îranê ya niha li deryayê disekine were firotin.
Wezîrê Xezîneyê yê Amerîkayê Scott Bessent li ser platforma Xê daxuyaniyek belav kir.
“Serê marî”
Scott Bessent Îran ji aliyê terorîzma cîhanî ve wekî "serê marî" pênase kir.
Wî diyar kir ku wan bi saya "Operasyona Xezeba Destanî" ya Serokê Amerîkayê Donald Trump, ev "têkoşîna jiyanî" ji dema pêşbînîkirî zûtir qezenc kiriye.
Scott Bessent got, "Birêvebiriya Trump dê ji bo zêdekirina herikîna enerjiyê ya li cîhanê, hêza xwe ya aborî û leşkerî bi kar bîne.
Ev pêngav wekî bersivekê ye li dijî êrişên terorîstî yên Îranê yên li ser binesaziya enerjiya cîhanî.
Em dixwazin aramiya bazarê biparêzin û dabînkirina cîhanî bihêz bikin."
140 milyon bermîl petrol
Bessent da zanîn ku wan ji bo firotina petrola Îranê ya ku niha li deryayê ye destûreke demkî daye.
Wî destnîşan kir ku petrola Îranê ya di bin cezayan de ji aliyê Çînê ve bi erzanî hatiye embarkirin.
Bessent diyar kir ku bi serbestberdana vê petrolê, Amerîka dê nêzîkî 140 milyon bermîl petrol bi lez bixe bazara cîhanê.
Bi vî awayî dê rêjeya enerjiya cîhanê zêde bibe.
Wezîrê Xezîneyê wiha pê de çû:
"Di esasê xwe de, dema ku em 'Operasyona Xezeba Destanî' didomînin, em dê petrola Îranê li dijî Tehranê bi kar bînin da ku bihayê wê nizm bimîne."
Tenê ji bo petrola li deryayê ye
Bessent tekez kir ku ev destûra demkî tenê ji bo wê petrolê ye ku niha di qonaxa veguhestinê de ye.
Wî eşkere kir ku destûr nayê dayîn petrola nû were kirîn an hilbirîn.
wî her wiha diyar kir ku dê Îran di bikaranîna dahata vê petrolê de zehmetiyan bikişîne.
Bessent ragihand ku Amerîka dê zexta xwe ya herî zêde li ser Îranê û gihîştina wê ya pergala darayî ya navdewletî bidomîne.
Biryar heta 19ê Nîsanê derbasdar e
Scott Bessent anî ziman ku birêvebiriya Trump heta niha xebitiye ku 440 milyon bermîl petrola zêde bixe bazara cîhanî.
Wî got ku wan bi vî awayî şiyana Îranê ya bikaranîna aloziyên li Tengava Hurmîzê lawaz kiriye.
Bessent da zanîn ku bernameya Trump a ku dostê enerjiyê ye, berhemanîna petrol û gaza xwezayî ya Amerîkayê gihandiye asta herî bilind.
Ev jî ewlehiya enerjiyê xurt dike û lêçûna sotemeniyê kêm dike.
Wezîrê Amerîkayê got, "Her têkçûneke demkurt a ku niha çêbibe, dê di dawiyê de ji bo Amerîkiyan bibe destkefteke aborî ya demdirêj.”
Li gorî lîsansa Wezareta Xezîneyê ya Amerîkayê, destûr hatiye dayîn ku ew petrol û berhemên petrolê yên Îranê yên ku berî demjimêr 00:01ê 20ê Adarê li keştiyan hatine barkirin, bi demkî werin firotin û valakirin.
Ev destûr dê heta demjimêr 00:01ê 19ê Nîsanê derbasdar be.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse