Koma Şanoyê ya Hawarê li Umanê 4 xelatên herî baş bi dest xistin

Hewlêr (Rûdaw) - Koma Şanoyê ya Hawarê ya Kerkûkê da zanîn ku wan piraniya xelatên sereke yên festîvaleke navneteweyî ya li Umanê bi dest xistine.

Komê destnîşan kir ku ev yek îspata wê rastiyê ye ku şanoya Kurdî tevî kêmasiya derfetan dikare di asta cîhanî de pêşbaziyê bike.

Wan her wiha tekez kir ku ew vê destkeftiya dîrokî wekî wefayekê ji bo ruhê rojnameger û hevalê xwe yê şanoger ê dêrîn Helkewt Ezîz dibînin.

Şanoya 'Selma' di nav 63 berheman de derket pêş

Di Festîvala Navneteweyî ya "Leyalî Ofîr" a ji bo Duodramayê de ku li bajarê Selaleyê yê Umanê hat lidarxistin, şanoya "Selma" wekî nûnera Herêma Kurdistanê û Îraqê beşdar bû.

Ji nav 63 berhemên ku ji seranserê cîhanê hatibûn pêşkêşkirin, tenê 9 şano ji bo pêşbirka dawî hatin hilbijartin.

Koma Hawarê ku komeke şanoyê ya Kerkûkê ye, di vê pêşbirkê de karî ji 6 xelatên festîvalê 4 xelatên sereke bi dest bixe.

Xelatên ku hatin standin ev bûn: Berhema şanoyê ya herî baş, derhênerê herî baş (Nejad Necim), lîstikvana herî baş a jin û lîstikvanê herî baş ê mêr.

"Belgeyeke hunerî ya komkujiya Kurdan e"

Derhênerê komê Nejad Necim, beşdarî bultena Nûrojê ya Rûdawê bû û amaje bi wê yekê kir ku ev serkeftin ji bo hunera Kurdî şanaziyeke mezin e.

Nejad Necim got, "Me îspat kir ku em dikarin bi şanoyê dengê mezlûmiya gelê xwe bigihînin cîhanê.

'Selma' ne tenê lîstikek e, belkî belgeyeke hunerî ya komkujiya Kurdan (Helebce û Enfal) e ku em dixwazin bi rêya wê peyama xwe bigihînin Dadgeha Navneteweyî ya Laheyê."

Necim her wiha diyar kir, "Tevî ku ziman Kurdî bû jî, temaşevanên Ereb û biyanî bi rêya zimanê laş û derbirînên hunerî, bi kûrahî ji êş û azara nav çîrokê fêm kir."

Wefayek li ser dika şanoyê

Kêliyên herî girîng ên festîvalê, terxankirina xelatan bû ji bo ruhê Helkewt Ezîz.

Helkewt Ezîz birêvebirê koçkirî yê ofîsa Rûdawê ya Bexdayê bû ku di heman demê de endamekî dêrîn ê Koma Şanoyê ya Hawarê bû.

Nejad Necim derbarê vê mijarê de got, "Helkewt ne tenê hevkarek bû, ew beşekî nedihat veqetandin ê malbata me ya hunerî bû.

Dema me li Umanê nûçeya koça wî ya dawî bihîst, me hemû xelatên xwe wekî wefayekê pêşkêşî ruhê wî yê pak kirin, çimkî para wî jî di vê serkeftinê de hebû."

Vexwendinên nû yên navneteweyî

Nejad Necim her wiha amaje bi wê yekê jî kir ku piştî vê çalakiya wan a li Umanê, ji bo koma wan çend vexwendinên fermî hatine.

Ev vexwendin ji bo beşdarbûna di festîvalên navneteweyî yên li welatên Fransa, Rûsya û Mexrîbê (Fas) de ne.