Hewlêr (Rûdaw) - Li bazarên Asyayê daketina bihayê zêr berdewam ku û daket asta herî nizm a 7 mehên dawî.
Zêr îro bi rêjeya ji sedî 0,7 erzan bû û her onsek gihîşt 3 hezar û 970 dolarî.
Ducare bihêzbûna nirxê dolarê Amerîkayê û zêdebûna çaverêkirinan ji bo tundkirina siyaseta dravî ji aliyê Banka Navendî ya Amerîkayê ve, daxwaza li ser zêr kêm kiriye.
Sînorê 4 hezar dolaran hat şikandin
Çarşemê cara yekem piştî Çiriya Paşîna 2025an, nirxê zêr ketiye binê asta sereke ya 4 hezar dolaran.
Nirxê zer niha li gorî asta herî bilind a dîrokî ya ku di meha 1ê (Kanûna Paşîn) de tomar kiribû, nêzîkî ji sedî 30 kêmtir e.
Ev kêmbûn di demekê de ye ku nirxê dolar ji ber pêşbîniyên zêdekirina faîzê ya li Amerîkayê, di asta herî bilind a 13 mehên dawî de bi cih bûye.
Guherîna pêşbîniyên li ser faîzê
Her çend berê dihat çaverêkirin ku Banka Navendî ya Amerîkayê di Kanûna Pêşîn de faîzê zêde bike, lê niha pêşbînî wisa ne ku dê rêjeya faîzê zûtir were bilindkirin.
Rapirsî eşkere dikin ku di meha bê de ji sedî 66 îhtimala zêdekirina faîzê heye.
Her wiha tê pêşbînîkirin ku di meha 9an (Îlon) de jî careke din faîzê zêde bikin.
Şirovekarên banka INGyê di daxuyaniyeke xwe de diyar kir, "Kêmbûna nirxê zêr nîşan dide ka bazar çi qasî bala xwe daye ser bandora bilindbûna rêjeya faîzê û tundkirina siyaseta dravî."
Tê çaverêkirin ku îro amarên girêdayî lêçûnên xerîdaran werin eşkerekirin.
Ev amar dikarin bandorê li ser siyaseta dravî ya Banka Navendî ya Amerîkayê bikin.
