ROJAVA - Kurd navên xwe dixwazin

Hewlêr (Rûdaw) - Li Rojavayê Kurdistanê navên bi sedan gund û bajaran ji aliyê hikûmetên neteweperest ên Ereban ve hatine Erebîkirin û ev rewş heta niha jî didome.

Piştî rûxîna desthilata Beasê û derketina biryarnameya (mersûm) 13an jî ev rewş didome.

Kurd dixwazin navên gund û bajarên wan ên resen werin vegerandin lê hikûmeta nû ya Sûriyeyê jî ti hêvî nedane.

Navên ku hatine guhertin

Polîtîkayên Erebkirin û Erebîkirinê mohra xwe li erdnîgariya Kurdistanê xistiye. Çend mînakên guherandina navan wiha ne:

-          Kobanî / Eyn el-Ereb

-          Dêrik / el-Malikiye

-          Til Koçer / el-Yeirûbiye

-          Girkê Legê / Mabede

-          Tirbespî / el-Qehtaniye

-          Şiyê - Şêx el-Hedîd

Navên biyanî li gundên Kurdan

Li herêma Cizîrê navên bajarên Îraq, Tûnis û Filistînê li gundên Kurdan hatine kirin.

Navên wekî el-Necef, Kerbela, Qeyrewan, Heyfa û Ekayê li ser gundan hatine sepandin.

Mînakên din ên li herêmê bi vî rengî ne:

-          Pilêsî / Kerbela

-          Quldûman / Necef

-          Rikava / Heyfa

-          Baot / Xeze

-          Gir Şêran / Eden

-          Girê Siwêr / Sebaa

-          Bîrikê Kosekan / el-Beis

-          Mizgeft / Wehran

-          Şêran / Ferezdeq

-          Xaltan / el-Xalidiye

Li Efrînê Erebîkirineke sîstematîk

Li herêma Efrînê sala 1977an, bi biryara 158an navên 190 gundên Kurdan hatin Erebîkirin.

Ev biryar wekî xaleke herî reş a polîtîkayên dijî Kurdan a wê serdemê tê dîtin.

Xwenîşandana li Kobaniyê

Li bajarê Kobaniyê ji bo parastina navên resen çalakiyan dest pê kiriye.

Tê payîn îro li bajêr li dijî Erebîkirina navê bajar û gundên Kurdistanê xwenîşandanek were lidarxistin.

Hat eşkerekirin ku li herêmên din ên Rojavayê Kurdistanê heta niha li ser vê mijarê bêdengî heye.