Hewlêr (Rûdaw) - Civîna Parlamentoya Kurdistanê piştî zêdetirî 2 salan ji bêçalakbûnê dest pê kir.
Rêjeya yasayî ya ji bo civînê ku 50+1 e, temam bû û civîn bi amadebûna 52 parlamenteran dest pê kir.
Armanca sereke ya vê gavê ew e ku saziya yasadanînê ya Herêma Kurdistanê ji nû ve dest bi karên xwe bike.
Tê armanckirin ku bi vê gavê dawî li valahiya yasayî bê anîn.
Desteya serokatiyê ya nû
Parlamento îro bi taybetî ji bo hilbijartina desteya serokatiyê civiya.
Li gorî agahiyên Rûdawê, desteya serokatiyê ya Parlamentoya Kurdistanê wiha hat diyarkirin:
· Dr. Vala Ferîd, Seroka Parlamentoyê
· Ramî Nûrî, Alîkarê Seroka Parlamentoyê
· Muna Qehwecî, Sekretera Parlamentoyê
Helwesta fraksiyonan
Piraniya fraksiyonan beşdarî civîna îro ya parlamentoyê bûn.
Partiya Demokrat a Kurdistanê (PDK) bi hemû endamên xwe ve di civînê de amade bû.
Tevî ku Yekîtiya Niştimanî ya Kurdistanê (YNK) û Nifşê Nû berê ragihandibû ku ew dê tevlî civînê nebin jî ji her du fraksiyonan çend parlamenter beşdarî civînê bûn.
Li aliyê din, tenê Yekgirtûya Îslamî ya Kurdistanê bi ti parlamenterên xwe beşdarî civînê nebû û boykot kir.
