Hewlêr (Rûdaw) - Rûniştina Parlamentoya Kurdistanê bi serokatiya parlamenterê herî temenmezin û bi beşdariya 52 parlamenteran hat lidarxistin.
Di rûniştinê de Desteya Serokatiya Parlamentoya Kurdistanê hat hilbijartin.
Zengilê rûniştina Parlamentoya Kurdistanê îro demjimêr 11:00an lê da.
Li gorî agahiyên ku Rûdawê bi dest xistine, 52 parlamenter beşdarî rûniştinê bûn.
Bi vî awayî piraniya yasayî pêk hat û hejmara pêwîst a 50+1ê hat derbaskirin.
Endamên Desteya Serokatiyê
Desteya Serokatiya Parlamentoya Kurdistanê bi vî awayî hat hilbijartin:
Vala Ferîd: Parlamentera PDKyê, bi 52 dengan wekî Seroka Parlamentoyê hat hilbijartin.
Ramî Nûrî: Parlamenterê Xirîstiyan ê ji bazneya Hewlêrê, bi 52 dengan wekî Alîkarê Seroka Parlamentoyê hat hilbijartin.
Muna Nebî Qehweçî: Parlamentera Partiya Çaksaziya Tirkmen, bi 52 dengan wekî Sekretera Parlamentoyê hat hilbijartin.
Kî beşdarî rûniştinê bûn?
Li gorî zanyariyên Rûdawê, hemû 39 parlamenterên Fraksiyona PDKyê di rûniştinê de amade bûn.
Her wiha hinek parlamenterên Tirkmen û Xiristiyan û ji fraksiyonên din jî hinek parlamenter beşdarî rûniştinê bûn.
Ji Yekgirtûya Îslamî ya Kurdistanê (Yekgirtû) û Tevgera Goranê ti parlamenter beşdarî rûniştinê nebû.
