Mêrdîn (Rûdaw) – DEM Partiyê li navçeya Qoserê ya Mêrdîna Bakurê Kurdistanê ji bo budceyê çalakiyek li dar xist.
Di çalakiyê de cotkar bi traktorên xwe daketin kolan û rêyan.
Hevseroka Giştî ya DEM Partiyê Tulay Hatîmogullari û parlamenterên jin ên Mêrdînê bi şalwarên xwe tevlî çalakiya cotkaran bûn û Hatîmogullari li traktorê siwar bû.
Çalakî ji aliyê Rêxistina DEM Partiyê ya Qoserê ve bi dirûşma "Budce Ji Bo Dad, Nan û Aştiyê" hat lidarxistin û li Qada Azadiyê ya navçeyê kursiyê gel hat danîn.
“Cotkar dixwazin dengê xwe bigihînin Enqereyê”
Hevseroka Giştî ya DEM Partiyê Tulay Hatîmogullariyê di çalakiyê de axivî û got:
“Li Qoserê, li Mêrdînê li ser axa herî bibereket, mixabin êdî cotkar nikarin hilberînê bikin. Êdî xelk birçî ye, mihtacê nan e.
Îro cotkarên ku di vî karwanî de ne, dixwazin bi van traktoran erd û axa xwe biajon û qezenceke baş bi dest bixin. Ji ber vê yekê cotkar dixwazin ji vir dengê xwe bigihînin Enqereyê.”
“Qoser û Mêrdîn têra hemû Kurdistanê dikin”
Parlamentera Mêrdînê ya DEM Partiyê Salîha Aydenîzê jî xwest ku budce ji bo cotkar û kedkaran bê veqetandin û wiha got:
“Em dixwazin di vê budceyê de ji bo kedkaran, ji bo cotkaran û ji bo kesên ku dixwazin li ser erdê xwe têr bibin budce were veqetandin.
Eger polîtîkayeke baş a budceyê hebe, tenê erdnîgariya Qoserê û Mêrdînê têra hemû Kurdistanê û Mezopotamyayê dike.”
Cotkar û welatiyan gazin ji bihabûnê kirin
Cotkar û welatiyên ku beşdarî çalakiyê bûn jî li ser bihabûna lêçûnên çandiniyê û xerciyên jiyanê axivîn.
Cotkar Mahmut Şeran got, “Em ji bo bilindbûna mazotê, ji bo bilindbûna gubreyê û ji bo tunebûna bihayê garis û genim hatine. Em heqê xwe dixwazin û em jî dixwazin wekî însanan bijîn.”
Cotkar Abdurahman Erkan jî wiha axivî, “Mazot zem bûye, ceyran zem dibe, av zem dibe. Her tişt zem, zem, zem...”
Welatî Zuriye Kayikê jî nerazîbûn nîşanî kirîna genim a ji derve da û got:
“Diçin ji dewletan genim distînin. Bila destekê bidin gelê xwe wê çaxê em dê hemû aboriya xwe pê bikin. Wextê pereyê genim bikeve destê min, ez dê zêr bikirim, ez dê herim cilan bikirim, ez dê herim firaqan bikirim û xaniyan pê çêkim. Wê çaxê dê aborî zêde bibe.”
DEM Partî dê çalakiyên ji bo budceyê li bajar û navçeyên din ên Bakurê Kurdistanê jî li dar bixe.



