Dusseldorf (Rûdaw) - Lêkolerê Kurd di bernameya Diyasporayê ya Tora Medyayî ya Rûdawê de serkeftina Partiya Çep (Die Linke) a di hilbijartinên Berlînê de nirxand.
Wî da zanîn ku Partiya Çep tevî ku ji sedî 25ê dengan bi dest xistiye jî nikare bi tenê hikûmetê pêk bîne.
Her wiha bal kişand ser bandora van guherînan a li ser civaka koçberan û bi taybetî jî li ser Kurdan.
Lêkoler û nivîskarê Kurd ê şêniyê Berlînê Pêşrew Mihemed diyar kir ku di 30 salên borî de li Rojava modeleke nû ya çepgiran derketiye holê ku ber bi "siyaseta nasnameyê" ve çûye.
Di vê modelê de li ser kesayetiya kesan xebat tên kirin da ku kêmîne û komên marjînal bibin sembolên sereke yên siyasetê.
Pêşrew Mihemed destnîşan kir ku tecrubeya Elîf Eralpê ya li Berlînê kopyayeke rasterast a tecrubeya parlamentera Amerîkayî Alexandria Ocasio-Cortezê ye, ji ber ku paşxaneya her duyan jî ya koçberiyê ye û gotareke li dijî nijadperestiyê bi lêv dikin.
Wî tekez kir ku nifşê nû yê çepgirên Almanyayê ji gotara nifşê kevn ê mîna Gregor Gysi û Dietmar Bartsch ên ku girîngiyeke zêdetir dida erdnîgariya siyasî dûr ketine û nifşê nû bala xwe daye ser birêvebirina nasname û hestên çînên marjînal.
Sedemên serkeftina Partiya Çep
Pêşrew Mihemed li ser sedemên biserketina çepgiran da zanîn ku ev yek bi qeyranên rojane yên xelkê ve girêdayî ye.
Wî anî zimên ku ji ber bilindbûna zêde ya kirêya xaniyan a li Berlînê, Partiya Çep li şûna ku tirsa xelkê bi kar bîne, bi awayekî eşkere li ser pirsgirêka xaniyan û daxistina kirêya wan xebitî û rasterast bi hawara welatiyan ve çû.
Li ser sedemên derve jî Pêşrew Mihemed qala bilindbûna dengên partiya rastgir a AfDyê ya li eyaletên mîna Saksonya-Anhalt û Mecklenburg-Vorpommernê kir ku ew partî li ser belavkirina tirsa ji koçberan dixebite.
Wî diyar kir ku medyayên herêmî yên wekî yên Tirkiye, Îran û Qeterê ev tirs bi kar aniye û nûçeyên dersînorkirina bikom belav kirine.
Vê yekê ji bo Partiya Çep derfeteke zêrîn afirand da ku xwe wekî parêzvana koçberan nîşan bide û dengên wan kom bike.
Bandora serkeftina çepgiran a li Diyasporaya Kurdan
Pêşrew Mihemed li ser bandora xurtbûna çepgiran a li Diyasporaya Kurdan bal kişand ser du aliyên cuda:
Ji aliyê civakî ve: Çepgir li ser demokratîkkirin û damezirandina karmendên perwerdebûyî yên di daîreyên koç û tenduristiyê de dixebitin ku ev yek rasterast sûdê dide Kurdan.
Ji aliyê siyaseta derve ve: Çepgir ji bo alozî û krîzên Rojhilata Navîn ne xwedî nêrîneke aqilane ne û tenê dirûşmên giştî yên wekî aştiyê bi kar tînin. Di dema şerê li dijî DAIŞê de Partiya Çep bi berdewamî li dijî şandina çekan a ji bo Hêzên Pêşmergeyan bû, ji ber ku dîtina wan a klasîk a Marksîst e û bawer dikin ku aştî tenê bi yekîtiya çîna karkeran pêk tê bêyî ku ji serweriya neteweyî fêm bikin.
“Pêgeha Kurdan a di rojeva Partiya Çep de kêm bûye”
Pêşrew Mihemed di dawiyê de hişyarî da ku ji ber bandora dewletên herêmê yên wekî Îran, Tirkiye û Qeterê ya di nava Partiya Çep de, gotareke tund a antî-emperyalîst û antî-siyonîst derketiye pêş.
Ji ber vê yekê jî têkoşîna serweriya Kurdistanê wekî dijayetiya dewletên herêmê tê dîtin û vê yekê kiriye ku pêgeha Kurdan a di rojeva Partiya Çep de kêm bibe.
