Nisêbîn (Rûdaw) - Evdilezîz Işik Kurdekî ji navçeya Nisêbînê ya Mêrdînê ye û ew 74 salî ye.
Ew qet neçûye dibistanê lê wî bi derfetên xwe, xwe ferî nivîsandina Kurdî kiriye.
Piştî ew fêrî Kurdî dibe dest bi nivîsandina helbestên bi Kurdî dike.
Wî heta niha bi derfetên xwe 8 pirtûk nivîsandine û belav kirine ku 7 bi Kurdî ne û yek jî bi zimanê Tirkî ye.
Du pirtûkên wî yên helbestan jî niha li çapê nê. Wate tevî nexwendî ye 10 pirtûkên helbestan nivîsandine.
Evdilezîz Işik hîn jî berdewam helbestan dinivîsîne.
Heta niha haya kesî ji wî û helbestên wî nebûne û cara ewil ji Rûdawê re behsa çîroka xwe ya nivîskariyê kir.
Nivîskarê nexwendî Evdilezîz Işik got:
“Ez ji Kercosa Êlihê me û li gundê Xirbê Seyîda hatime dinyayê. Di zarokatîya xwe de em hatine Nisêbînê li gundê Hopê bi cih bûne.”
Qet neçûye dibistanê
Çevên mamê Evdilezîz di jiyana wî de hîç bi dibistanê neketîye û wî nexwendiye.
Evdilezîz Işik wiha behsa vê yekê kir:
“Min gelekî dixwest ku ez herim mektebe lê îmkan tunebûn. Mekteb li gundê me tunebûn.
Bajar jî dûrî me bû. Min di deh saliya xwe de hewl da xwe fêrî nivîsê bikim.
Min dest pê kir. Min ji xwe re elfabe anî, qelem anî, deftera sipî anî.
Ew camêrên ku dihatin mala me ez diçûm cem wan min digot ka vê herfê ji min re binivîse, ev çi herf e.
Wan nîşanî min da û min bi wî awayî xwe elimand nivîsandinê.”
Piştî ew fêrî nivîsandin û xwendiyê bûye dest bi nivîsandina helbestên Kurdî kiriye.
10 pirtûk nivîsandine
Bi wî xireta xwe ya balkêş wî heta niha deh pirtûkên helbestên Kurdî nivîsandine û her wiha bi derfetên xwe li ser navê kalikê xwe Bekê weşanxaneyek ava kiriye û pirtûkên xwe weşandine.
Evdilezîz Işik got:
“Sala 2004an pirtûka ewil a bi navê Kaniya Eşqê hat weşandin.
Piştî ku min pirtûka Kaniya Eşqê xilas kir, min dest bi yên din kir. Hemû jî pirtûkên eşqê evîniyê ne.”
Helbestên nivîskarê nexwendî zêdetir evînî ne, ew niha jî berdewam dinîvîsîne.
Deng û hisên wî ji sînorê Nisêbînê derneketine
Lê li gel deh pirtûk çap kirine jî deng û hisên wî ji sînorê Nisêbînê derneketine û ji bilî derdora wî haya kesî ji berhem û berhemdariya nîne.
Evdilezîz Işik çima bi zima Kurdî nivîsandiye wiha behs kir:
“Wê deme li rexê me gelek kasan Tirkî nedizanî. Hemû Kurmancî bûn.
Li mala me, li nav gund em bi Kurmancî diştexilîn. Li her derî me bi zimanê Kurmancî xeber dida.
Ji bo wê yekê Kurmanciya me xurttir bû. Ji bo wê yekê min 7 pirtûk bi zimanê Kurmancî nivîsî û yek jî bi Tirkî.
“Ji xeynî Nisêbînê kesî pirtûkên min nas nekirin”
Helbet ji xeynî Nisêbînê kesî pirtûkên min nas nekirin. Mi dixwest ku werin naskirin.
Va ye ez, va ye pirtûkên min. Çil weşanxaneyên Kurdî hene, bila werin ez hazir im.
Ji xwe re çap bikin, çi bikin ez dê kêfxweş bim. Ziman tişteke xweşik e. Ne tene zimanê Kurdî.
Heke tu pênc zimana zanibî tu pênc însan î. Heke em bi hev re bi Kurmancî biştexilin, ev edetên me yên berê dê neyên jibîrkirin.
Ew gotin û ew soz nayên jibîrkirin. Ji ber wê jî bi hev re biştexilin qenc e.
Zarokên min jî bi Kurmancî diştexilin. Wan xwendine û bûne mamoste jî dîsa li malê bi Kurdî diştexilin.”
