Hewlêr (Rûdaw) – Weşanên Avestayê pirtûka helbestan a Pirpizêkên Bizdok a Esra Sadikogluyê çap û belav kir.
Weşanên Avestayê çapkirina pirtûka Pirpizêkên Bizdok a Esra Sadikogluyê ji Tora Medyayî ya Rûdawê re ragihand.
Pirtûka helbestan a Pirpizêkên Bizdok ji rêzepirtûkên Şahmaranê derketiye û ji 80 rûpelan pêk tê.
Helbesteke di nava pirtûka helbestan a Pirpizêkên Bizdok de:
“Sola kabik
Li pêş texsiya kîso
Fera wê li hembêza
Jina qahpik
Dimeşe jin
Nameşe texsî
Xeyal dilikumin
Bê sol, bê rol
Kaxiza jiberkirinê
Ji derhênerê reviyayî
Dibe destmal
Bi sêwîevînên xwe re
Dikeve serê dîlanê
Temaşevan şeva tarî
Bahol, dahol
Gulî, tilîlî ye
Dibeze berbangê
Jinek bi ferek sol
Solek bi ferek çîp
Winda ye
Li bala we ye?”
Esra Sadikoglu kî ye?
Esra Sadikoglu sala 1981ê li navçeye Şemrexê ya parêzgeha Mêrdînê ya Bakurê Kurdistanê ji dayîk bûye.
Wê li Zanîngeha Stenbolê beşa Ziman û Wêjeya Tirkî xilas kiriye.
Esra Sadikogluyê her wiha li Zanîngeha Artukluyê di beşa Ziman û Wêjeya Kurdî de mastera xwe temam kiriye.
Ew di kovara Rewşen-Nameyê de xebitiye, helbest, werger û çîrokên wê di kovarên Rewşen-Name û Notosê de çap bûne.
Esra Sadikoglu niha li Amedê dijî.
