Hewlêr (Rûdaw) - Partiya Welatparêzên Kurdistanê (PWK) got, “Birîna Kurdên Êzidî birîna hemû Kurd û Kurdistaniyan e ji bo pêçandina birîna Kurdên Êzdî pêwîstî bi bernameyeke taybet heye.”
Îro di ser komkujiya Kurdên Êzidî re 11 sal derbas dibin ku li Şingalê bi destê DAIŞê zêdetirî 5 hezar Kurdên Êzidî hatin kuştin.
DAIŞê 3yê Tebaxa 2014an êrişî Şingalê kir û bi hezaran Kurdên Êzidî kuştin.
Bi hezaran jin û zarok hatin dîl girtin û revandin û bi sed hezaran kes jî koçber bûn.
Her wiha ji ber şer, ji sedî 80yê bajar û gundên Şingalê wêran bûn.
PWK bi minasebeta 11emîn salvegera Komkujiya Şingalê peyamek belav kir û got:
“Birîna jenosîda Şingalê ya xwişk û birayên me yên Kurdên Êzidî birîneke kûr e û ev birîna hemû Kurd û Kurdistaniyan e.
Heta niha jî gelek keç û jinên Kurdên Êzidî di destên DAIŞa hov de ne û çarenivîsa wan ne diyar e.
“Kurdên Êzidî nikarin vegerin cih û warên xwe”
Heta niha jî piranîya gelê me yê Êzidî ku mecbûr mane Şingalê terk bikin, nekarin vegerin cih û warên xwe.
Divê parlamento û Hikûmeta Herêma Kuristanê ji bo pêçandina vê birîna kûr û dijwar a xwişk û birayên me yên Kurdên Êzidî bernameyeke taybet amade bikin û bi cih bînin.
“Bila Neteweyên Yekbûyî jenosîda Kurdên Êzidî qebûl bike”
Em bangî Netewên Yekbûyî dikin ku vê komkujî û jenosîda Kurdên Êzidî bi awayî fermî qebûl bike.
Di salvegera 11mîn a jenosîd û komkujiya Şingalê ya xwişk û birayên me Kurdên Êzidî, em rêxistina hov û terorîst DAIŞê û hemû piştgirên wan careke din şermezar û rûreş dikin.
Em di salvegera 11mîn a jenosîda Şingalê de, hemû şehîdên vê jenosîdê bi giramî bibîr tînin, em xemxur û şirîkê hemû êş û birînên xwiş û birayên me yên Kurdên Êzidî ne.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse