Hewlêr (Rûdaw) - Li parêzgeha Colemêrgê ya Bakurê Kurdistanê otomobîlek ket nav Çemê Zê û di qezayê de kesek mir û kurê wî yê 10 salî jî bi giranî birîndar bû.
Qeza îro li gundê Ketinisê yê Colemêrgê, li ser rêya sereke ya Wan û Colemêrgê çêbû.
Li gorî zanyariyan otomobîla ku welatiyê bi navê Aydin Yeşîlgoz diajot ji rê derket û ji kendalekî ket û çû nav Çemê Zê.
Aydin Yeşîlgoz piştî qezayê ber avê ket û kurê wî yê 10 salî Muhammet Yeşîlgoz ku bi giranî birîndar bûbû bi derfetên xwe ji avê derket.
Li ser agahdarkirinê tîmên tenduristî çûn cihê bûyerê û wan Muhammetê 10 salî bir Nexweşxaneya Dewletê ya Colemêrgê.
Termê Aydin Yeşîlgoz jî derdora kîlometreyekê dûrî cihê bûyerê ji aliyê tîman ve ji çem hat derxistin û tîman ew bir morga nexweşxaneyê.