Hewlêr (Rûdaw) – Li Amedê, tabloya bi navê ‘Tazî û Kujer’(The naked & killer) ku tê angaştin a Wênesaz û Peykertraşê navdar ê Ispanyolî Pablo Picasso ye hate bidestxistin. Li ser tabloyê mohra Muzeya Neteweyî ya Iraqê li ser heye.
Walîtiya Amedê di daxuyaniyekê de ragihand, hêzên ewlehiyê li navçeya Yenîşehîr a Amedê dest bi ser vê tabloya Picasso de girtine.
Walîtiya Amedê ragihandiye, di operasyoneke hevebeş a tîmên Birêveberiya Beşa Tawanên Organîze û Qaçaxçîtî ya Fermandariya Leşkerî ya Amedê û Fermandariya Leşkerî ya Navçeya Kayapinarê de, di malekê de tabloya bi navê ‘Tazî û Kujer’(The naked & killer) a Wênekêş û Peykertraşê navdar ê Ispanyolî Pablo Picasso ye, hate dîtin û dest bi ser wê tabloya giranbuha de hate girtin.
Di daxuyaniyê de hatiye gotin, ku têkildarî vê dosyeyayê 5 kes jî hatine desteserkirin, ku amadekarî kiribûn vê tabloyê bifiroşin.
Li gor daxuyaniyê, li pişt vê tabloya ku di malê de hatiye bidestxistin, bi Îngilîzî nivîsek bi naveroka; “Tazî û Kujer: Ev şaheser, tabloya Picasso ye û ji alî me ve hatiye pêşandan.” heye û li ser tabloyê jî îmzeya ku tê angaştin a nîgarkêş û peykertraşê navdar ê Spanyolî Pablo Picasso ye heye.
Herwiha li ser vê tabloya ku di qebareya 78x51 cm de ye, mohra Muzeya Neteweyî ya Irakê heye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse