Hewlêr (Rûdaw) - Serokwezîrê Herêma Kurdistanê Mesrûr Barzanî ragihand ku welatî bi xwe berpirsyarê bikaranîna elektrîkê ne.
Hikûmeta Herêma Kurdistanê îro bi awayekî fermî projeya e-Psuleyê ragihand.
Mesrûr Barzanî eşkere kir ku welatiyê elektrîkê zêde bi kar bîne dê pereyê zêde bide û yê ku kêm bi kar bîne dê pereyê kêm bide.
Serokwezîrê Herêma Kurdistanê li ser bihayê elektrîkê daxwazek ji hikûmetê kir û got:
"Ez ji hikûmetê dixwazim ku ji bo kesên ku vê mehê e-Pusuleyê bi kar tînin ji sedî 20 erzaniyê bike."
Mesrûr Barzanî li ser meaşên mehên bê jî got, "Em dê bibin parêzvanê hemû mafên darayî yên meaşgirên Herêma Kurdistanê lê niha mijara meaşan di destê Bexdayê de ye."
Serokwezîrê Herêma Kurdistanê di berdewamiyê jî de got, "Divê Bexda di dayîna meaşan de cudahiyê nexe navbera welatiyên Herêma Kurdistanê û pabendbûna xwe ya bi destûrê ducare bike."
Mesrûr Barzanî derbarê posta serokkomariyê û namzedê Kurd ê ji bo wê postê jî got, "Ew posta Kurdan e û aliyek nikare namzedê xwe ferz bike."
Mesrûr Barzanî diyar kir ku PDK dixwaze hikûmeta nû zû were avakirin û li ser encamên hilbijartinê bê avakirin.
Mesrûr Barzanî ragihand, e-Psule ji bo Herêma Kurdistanê destkeftiyeke mezin e.
Serokwezîrê Herêma Kurdistanê di dema ragihandina projeyê de got, "Girîng e ku mirov sîstema dîjîtal bike cihê pergalên din."
Di e-Psuleyê de du bank û sê cizdanên elektronîk hene û Banka Navendî ya Îraqê jî wê sîstemê nas dike.
Mesrûr Barzanî amaje pê kir ku pergala e-Psuleyê dê hem ji bo daîreyên hikûmetê û hem jî ji bo welatiyan bibe hêsankariyeke baş.