Li Dihokê Festîvala 18emîn a Salane ya Tirî û Hingiv dest pê kir.

Serokwezîr Mesrûr Barzanî festîval vekir.

Di festîvalê de cotkar berhemên xwe nîşan didin û festîval dê 2 rojan dewam bike.

Di festîvalê de 40-50 cotkar dê di navbera saet 10:00 û 22:00yan de berhemên xwe pêşkêş bikin.

Birêvebirê Çandiniyê yê Dihokê Ehmed Cemîl ji Rûdawê re ragihand, "Îsal me 60 ton tirî û 127 ton hingiv bi dest xist."

Wî bal kişand ser kêmbûna berbiçav a berhema hingiv a ji ber ziwabûnê.

Berhema hingiv, bandora cidî ya ziwabûnê ya li ser hilberîna çandiniyê ya herêmê nîşan dide, ji 300 tonên sala borî zêdetirî ji sedî 50î kêm bû û daket tenê 127 tonan.

Dihok piraniya tiriyê ku li Herêma Kurdistanê tê berhemanîn dabîn dike.

Ehmed Cemîl got, di navbera 1ê Tîrmehê û 15ê Çiriya Paşîn de îtxalata tirî ya ji bo nav Herêma Kurdistanê hatiye qedexekirin û vê yekê "sûdeke mezin daye bazarkirina tirî."

Li gorî wî, di festîvalê de ne tenê tirî û hingiv, "hemû berhemên din ên xwemalî û berhemên ajaldariyê jî cih digirin.

Berhemên çandiniyê yên Dihokê di qada navneteweyî de hatine naskirin.

Serok Mesûd Barzanî, di merasîma vekirina parkeke bîranînê ya Pêşmerge de li Parîsa paytexta Fransayê, hingivê berhema xwemalî diyarî Şaredara Parîsê Anne Hidalgoyê kiribû.

Li gorî Birêvebiriya Baxçevaniyê ya Dihokê, di nav sînorên parêzgehê de zêdetirî 39 hezar donim rezên tirî hene û tevî şert û mercên dijwar ên avhewayê jî piştgirî li hilberîna tirî ya herêmê tê kirin.

Wêne: Eyûb Nisrî/Rûdaw